有「亞瑟王」之稱嘅教統局局長李國章，原來係金庸迷，噚日出席佢自己形容為「武林大會」嘅「香港創意思維活動競賽」開幕禮時，就搬出《射鵰英雄傳》中嘅郭靖同「老頑童」周伯通，教學生要學佢哋兩人，先可以做一個有創意嘅成功人士。佢呢篇「聖旨」咁有創意，同其他官員例牌嘅文謅謅致辭，絕對係好難得嘅佳作。
李國章話郭靖係「俠之大者」，做人頂天立地，但就冇乜創意，人哋學一日就識嘅功夫，佢要練十日；「無論對手出乜招，佢只係識用『亢龍有悔』一掌嚟對付。」咁究竟點解要學郭靖？佢就話係因為郭靖有好驚人嘅堅忍同毅力，不斷練習，終練出蓋世神功。
而周伯通呢，李國章話佢好奇心好重，又成日鍾意玩，「佢被困挑花島，為咗解悶就自行創出『雙手互搏』，即係用自己嘅左手同右手對打；古時冇快艇，佢就馴服一啲鯊魚，遨遊大海。」佢讚周伯通會不斷嘗試，將自己嘅意念付諸實行。
李國章勸告學生，有郭靖嘅穩重、紮實、努力，又有周伯通嘅創意，就可以天下無敵；但如果冇創意又唔肯努力，就會變成「吸星大法」嘅門徒，「即係一聲唔該，將人哋嘅內功修為通通吸過嚟，當做自己嘅去用。」
咁李局長噚日有冇搵「槍手」代筆呢？局長嘅新聞秘書阿May話，佢讀書時已經好迷金庸嘅作品，呢次真係佢親自操刀。
傳真︰2623-9278
電郵︰