早兩星期大家都為冇碟煩，但今個星期3區新碟就以鋪天蓋地之勢，一開6連發，而且套套好戲！小記喺旺角DVD碟舖閒逛咗個多小時，聽好多人怨聲載道，話買碟都買到窮，但畀錢攞碟時又笑晒口喎！無嘅，大家真係餓碟太耐喇！
記者、攝影：朱崇德
今個星期港、西、日片，林林總總劇種都有齊，選擇真係非常多樣化！首選正戲推介係《真的戀愛了》，此片乃由《４個婚禮一個葬禮》、《摘星奇緣》金牌編劇李察寇蒂斯(RichardCurtis)首次執導的作品；以十個英倫愛情小品，拼湊出一個爆笑的愛情故事！演員卡士亦是叫座原因，例如曉格蘭特就扮演花花公子首相，狂追俏茶水妹，就勁有現任英首相貝利雅的影子，睇到呢類名人醜聞趣事，真係份外投入！
如果情情塔塔唔係太啱睇，西片部份重有兩套勁賣「動作」嘅猛片，要睇肌肉型打到開巷嘅，就有蠍子王TheRock嘅《亞馬遜迷藏》；如果想鬥智鬥力，又要有飛車場面者，就有劇情片《天羅盜網》！
港產片類，就有剛落畫不久嘅《鬼馬狂想曲》；首有杜琪峰同韋家輝執導，質素已經有一定保證！再加上張栢芝扮林亞珍同Twins扮筷子姐妹花，想開開心心，冇煩冇腦睇套消閒片，《鬼馬狂想曲》的確係一套一家大細啱睇嘅好片！
講真！日本動畫類真係冇幾何有新片出，不過今個星期就好似趁熱鬧咁，一嚟就兩套；論故事張力又有深度者，當然係啱啱新出嘅《保衞者》啦！雖然係名動畫家大友克洋99年作品，但內裏所包含嘅「環保」寓意，咁多年後睇番都一樣發人深醒。《幽遊白書》係香港人最愛的經典漫畫之一，本周亦新返了一套《幽遊白書—冥界死鬥篇炎之絆》，主角幽助今次會同戰友藏馬、桑原、飛影等，為拯救人間界，不惜合力對抗魔力無窮的冥王。
電話：23326326
地址：旺角奶路臣街6E德發商場地庫B4舖
