台灣大選嘉年華玩到最高潮時，竟然玩出個阿扁遭槍傷事件，當時台股早已收咗市，港股就唔係好大反應，恒指低位12715，最多只跌過100點，而且好快就反彈，收報12790，跌幅收窄至25點。
阿扁與連戰之爭，原本只係叮噹馬頭，據聞阿扁受傷消息傳出後，選情即時有重大變動。現時香港政改問題鬧得熱烘烘，如果日後立法會選舉都出現槍擊事件，又或者有人為選票而施展苦肉計，港股唔插水都幾難。
中芯（981）愈跌愈深，噚日又跌6%至2.325元，成交減至8.58億元。上市首日包銷商德銀又沽又買，噚日則見到另一個保薦人一波入市接貨，守住2.30元水平，暫時沽壓唔算太大。
不過，阿虎側聞部份機構投資者唔滿意中芯表現，可能沽貨唔玩，到時保薦人嘅實力將備受考驗。
雖然承銷團有實力兼有誠意，但中芯兩日來成交股數已達13.26億股，相信保薦人嘅承接力已被消耗七七八八。
大新金融（440）宣布分拆銀行業務上市兼派現金股息，本來應屬好消息，但股價竟被大幅質低12%至58元。Cookie話，大新金融係基金股而非炒股，基金一向唔鍾意買控股公司，尤其當大新金融分拆銀行業務上市後，本身嘅業務變成冇乜睇頭，基金唔換馬就奇。
金匡（286）公布9個月賺4.4億元，刺激股價勁升25%至0.35元。不過，大家唔好忘記金匡曾經進行重組兼削債，相信金匡期內所謂嘅盈利，大部份來自削債收益入帳，而非真正有錢收。
阿虎