房屋署向房屋委員會提交減租方案，一共五個，各有優劣，後果則一，就係房委會損失慘重，將來假如入不敷支，當然唔會破產，因為政府一定要注資救佢吖嘛。注資嘅錢，即係納稅人嘅錢，我哋就算交多啲稅，政府左手來，右手去，都係冇法子搞掂財赤呢個大頭佛。
如果我哋納稅人能夠有聲出，左丁山就贊成其中一個方案，即係所有綜援戶免租，其他住戶一律免租百分之十。呢個方法既簡單可行，公屋租金損失又最少，而且理論上，綜援右手問社署攞錢，左手就交其中一部份畀房委會，政府損失不大。
呢次房委會要減租，皆因去年八月，房委會打輸官司，違反咗「租金與入息比例」中位數（MedianRenttoIncomeRatio）不得高於十巴仙嘅規定。呢個MRIR概念因中文譯名「租金與入息比例中位數」甚為混淆，好多人睇唔明，報紙紛紛出錯，就如《蘋果日報》三月十七日報道就寫成：「現行法例規定公屋租金不能高於入息中位數百分之十」、「蘋論」作者盧峯亦話：「公屋租金不得超過住戶入息中位數百分之十的不合理規定」。請各報記者編輯注意，法例規定係RenttoIncomeRatio嘅中位數（Median）不可超過百分之十，唔係租金不能超過medianincome嘅百分之十。將綜援戶嘅租金變為零，剔除於統計樣本之外，RIR嘅median就會立即降低，房委會起碼有幾年安樂，唔使再為呢件事傷腦筋。相信明白事理嘅議員，都會得些好意須回手，無謂得失啲選民嘞。