最近娛樂圈藝人風聲鶴唳，關心妍場綁架鬧劇重未玩完，噚日有記者突然收到電話，話有人喺尖沙嘴星光行外面嘅電話亭貼晒大字報，話要殺關心妍。
記者就即刻走去睇啦，好辛苦咁喺其中一個電話亭裏面搵到一張大字報，上款係寫畀「BMA唱片公司」，內容係「威：我已經和幾位兄弟買去美國的機票，我要綁架關心妍，我要的錢是一億，我給你五天準備，過了時間我會殺死關心妍，不要迫我殺人。」
馮仁昭之後打畀BMA唱片總經理Spencer，問佢知唔知呢件事，佢一聽到大叫黐線，然後話：「嗰個人一路冇打過畀我哋，亦冇接觸過阿Jade（關心妍），都唔知係咪貪得意，我哋唔會回應，根本已經變成鬧劇，搞到咁，最怕啲人以為我哋博宣傳，我哋會低調處理。」
Spencer話佢哋公司日日都有人同身喺美國嘅關心妍聯絡，亦有助手貼身跟住佢，𠵱家佢亦好安全。其實呢單嘢搞咗咁多日，嗰個阿威可能只係一個貪玩嘅狂迷，或者根本唔係叫阿威，難怪唱片公司鬼咁擔心人哋以為佢哋搵嘢嚟搞博宣傳啦。
陳小春、古巨基同薛凱琪前晚喺中文大學出席音樂比賽，小春啱啱喺台灣錄完音返香港，佢話喺當地都有留意總統選情，小春重話：「我第一次見證選舉氣氛，我睇好連戰同宋楚瑜，不過我三粒星身份證冇得投票，我覺得陳水扁都做咗四年總統，但在任期間都冇特別進步，可以搵第二個試吓。」
張國榮下個月一號逝世一周年，各地歌影迷到時會舉行連串悼念活動，不過哥哥個前經理人陳淑芬，早前接受查M
葉璇噚日凌晨三點幾，揸住架甲蟲車，載住個女仔朋友，一齊喺灣仔謝菲道出現，之後同埋幾個朋友一齊消夜，大約過咗一個鐘，葉璇又再做司機，送個女仔返將軍澳屋企，然後佢再自己返屋企，葉璇作為纖體代言人，半夜三更消夜，真係違反晒啲纖體守則咯。
張栢芝噚日接受港台《娛樂滿天星》訪問，佢即將前往內地同謝霆鋒拍攝新片《無極》，被問到因此成為傳媒嘅追訪對象，會否感到煩擾時，佢話：「唔會，我都預咗啦。我唔會care人哋點講，我尊重電影、導演同其他演員，所以我唔會發言，亦都唔會回應太多。」
最近有消息話羅浩楷會即將返《皆大歡喜》開工，噚日羅太透過電話透露老公最近病情，羅太話：「幾時出院未知，不過佢血壓低，要成日瞓，又唔行得，因為驚佢會頭暈，𠵱家佢就係瘦咗啲，冇咗個肚腩，佢重講笑話當減肥。」不過咁快就可以康復，羅太都可以放心啲啦！
