小初真係唔明，獲一眾外資大行睇好嘅超大現代（682），前日所公布嘅業績明明好靚仔，但偏偏股價反而倒跌，真係令人摸不着頭腦。
雖然有人話係趁好消息出貨，又話係因為公司唔派息，令到芬佬唔高興所致。但經紀黃就堅持，超大應該冇咁快炒完，可以睇中長線。超大噚日一度跌穿3元，低見2.90元，收3.075元，跌0.8%。
另外一隻有唔少芬佬坐咗貨嘅亞洲鋁業（930），將在3月29日公布中期業績。經紀黃話，估計業績唔會太差，但亦唔會有驚喜，屬於見得人嗰種。不過，股市睇未來，亞鋁在1月份股市仍然㷫烚烚之時，成功批股集資，現時大把錢在手，相信對未來提升生產能力好有幫助，所以仍然留住芬佬的心。
亞鋁今年1月份，以先舊後新方式，以每股1.56元，配售3.32億股，集資淨額5.065億元。雖然曾經跌穿過批股價，但在數間基金密密吸納之後，股價又升番上1.70元以上水平。
隻股噚日升3%，收1.71元，成交股數2724萬股，金額4656元。
慕容小初