台灣選舉噚日打響了槍聲，不但震動了寶島，也嚇壞了專程去取經嘅香港政界人士。
話說民協喺馮檢基帶領下，包括廖成利、譚國僑、梁錦滔、梁欐等一行二十二人，前日浩浩蕩蕩抵達台北，第一日去咗陸委會，噚日上晝去政大，以及綠營阿扁一間由興建中地盤臨時徵用嘅競選總部，阿基話，今年嘅紀念品全部都要畀一百到成千元台幣買，好識做生意。
食過午飯，佢哋去立法會參觀，正當民協一行人等坐車去緊藍營連宋競選總部之際，忽然聽到阿扁同呂秀蓮被槍擊事件，一時間，當地帶隊同司機都變得好沉重，一言不發。阿基佢哋去到總部都冇得入，鄭安國介紹一下情況就請佢哋離開，因為怕有事唔安全。
雖然氣氛好緊張，但係阿基同八方講，台北市到入夜都好平靜，冇人上街鬧事，台灣人好冷靜同理性。
傳真︰2623-9278
電郵︰