揭示今年手機潮流的德國CeBIT展覽會，18號正式於德國漢諾威開鑼，各大手機廠亦「大排筵席」，旗下全新手機蜂擁而上，而且繼SE、Nokia、西門子後，重有三星、LG等大廠，相繼公布旗下百萬像素手機，明顯今年戰線將集中喺鏡頭之上！
記者、攝影：劉耀祥
今年CeBIT規模一如以往，展覽場館接近30個，每個都起碼有兩個足球場咁大，行都行到腳軟。而手機參展商大部份亦集中於同一個展覽場館，其中三星攤位雖然並非最大，不過展出的新手機數量則為全場之冠，認真部部新鮮部部堅！
三星最人頭湧湧的攤位，首數P730嗰部份，會場外一早已大賣廣告，所以人流不絕實屬平常！不過P730本身亦已經甚有號召力，打破三星擰芒傳統，揭開機後以旋轉方式轉其26萬色、320×240嘅彩芒，轉出後亦可以再擰，配上機背100萬像素鏡頭，玩自拍時任何角度都擰得出！鏡頭可以拍片兼影相，每次拍片最長可拍100分鐘。內置有64MB記憶體任你拍，唔夠用重可以插RS格式MMC，最大支援512MB記憶卡。和弦鈴聲亦有64和弦，想換機嘅朋友，7月就可以郁手！
三星除P730大玩扭擰轉芒之外，現場更展出多款新機，全部都用上伸縮式機身，睇嚟伸縮式將會成為今年三星常用FormFactor！
百萬Symbian
呢部SGH-D710有100萬像素鏡頭搭上Symbian系統，為Smartphone規格推向更高層次，2.12吋大芒不論影相及操作都相當敏捷，兼且配備SD/MMC插槽。
女性新歡
SGH-E800體積與西門子SL55相若的E800，86g重量同樣走輕巧機路線，最搞鬼就係30萬像素鏡頭設於機中間，需伸出機身先可影相，吸引在場唔少女性目光。
無線扭鏡
從型號上不難看出，呢部E810乃E800的進階版，功能上大致相同，只是機身稍為膨脹，機頂亦增設有180o扭擰鏡頭，與E800攜手攻守男女用家市場。
東洋「伸」機
SGH-S341i支援GSM三頻制式，亦兼容i-Mode制式，對東洋旅行愛好者尤其方便，支援Doja（日本DocomoJAVA）、MMS及GPRS，內置30萬像素鏡頭及26萬色彩芒，未知會否於香港推出。
將個芒左扭右擰，上揭下轉已經唔再係三星嘅專利，就連日本大廠Panasonic都要玩「芒」，新機X300外形繼續其細機身路線，外表睇好似唔覺有何特別過人之處，不過只要將鏡頭蓋推下，驚喜就即時出現，皆因可以將成個6萬5色彩芒彈起，而30萬像素鏡頭則設於機左側，影相掣則設於右側，個芒彈起後影相時似拎住DV多過似手機。雖然機身細細，不過功能亦應有盡有，MMS、GPRS及40和弦，足夠一般用家使用。
德國CeBIT直擊同場百萬手機
雖然三星一眾新機吸引咗不少目光，不過同場其他廠商亦絕不示弱，頂級機種空群而出，亦一樣令到攤位熱鬧非常！
百萬像素手機當道，LG亦展出旗下130萬像素手機L5100，扭擰式26萬彩芒一貫LG風格，機背更設計成數碼相機款，不讓SES700專美。
近期甚受港人歡迎的Innostream，亦加入百萬像素手機行列，展出INNO50，130萬像素鏡頭及扭擰式顯示器，外形亦都甚似數碼相機，絕對可以延續「煙佬」神話。
SHARP的GX32將推出，會場內出現同用上CGSilicon顯示的TM100，伸縮式設計、超班顯示器，質素比百萬像素手機毫不遜色。
