港股昨日牛皮，恒指全日波幅135點，午市雖有台灣正副總統中槍消息，市況較反覆，亦只係在百點之內幾番上落。淡友未有趁壞消息斬多2両，可能意味大市已離底不遠，又或者先作反彈，然後再跌過。
公用股是日表現硬淨，兩電1煤中，以中煤（003）最醒神，升2.7%，收13.35元。中煤唯一嗰件Call輪9248，喺正股拉動下大升45%，高踞升輪榜第4位（頭3位被中移動Put輪霸晒），在淡市中已屬難能可貴。
9248現價1.29元，5月10日到期，槓桿率10.4倍，負溢價1.4%。揸中煤正股有23仙息派，下月19日除息，即使計埋呢個因素，9248實際溢價只係0.4%，槓桿率仍有10.2倍，依然好抵玩。
中電（002）升近2%，收41.6元，再創52周新高。唯一嗰件中電Call輪9302彈上38仙，升17%。隻輪玩到12月尾，槓桿率11倍，但有負溢價2.2%，皆因正股派末期及特別股息合共75仙。計及高息因素，9302實際溢價依然係負數（-0.4%），槓桿率有10.8倍。隻輪數據係靚，但追入前，要諗吓正股近排升幅唔細。
港燈（006）升2.4%，收報33.7元。港燈有兩件標準Call輪，9303成交空白，無謂講。9617昨升逾11%，收報26仙，玩到6月中，槓桿率13倍，負溢價3.3%。計及派高息1.13元，隻輪實際溢價只係0.1%，槓桿率有12.5倍，以數據而論，又係十分抵買。
章盛