商場大業主搞嘅推廣活動愈嚟愈多，想要引起消費者注意，真係少啲諗頭都唔掂。新地嘅大埔超級城商場就舉辦「2004全港至潮CoverGirl選舉大賽」，揀出嘅10個參賽者，會着住i.t.旗下品牌服飾喺商場行天橋做模特兒。由人氣女子組合COOKIES，同名設計師張學潤擔任評判。
當然，大業主唔會淨係請大家睇表演就算數，商場喺指定日子，會推出換購平價機票優惠，只要喺商場消費滿一定金額，就有機會用1388蚊優惠價，換取價值3500蚊嘅東京來回機票1張。
另外，同樣好積極為旗下商場搞活動嘅信和集團，下個禮拜重會宣布嚟緊復活節有乜推廣策略，同埋專為內地自由行客而設嘅活動詳情。
睇嚟，呢個復活節消費者都好唔得閒，要諗吓去邊個場消費至好玩、至着數。
香港嘅商場，一般都喺落成前一年半載至招租，但係內地就唔同，好多時喺構思階段已經搵定租客，但係幾時落成就真係天曉得！有啲可能因為工程問題、政府手續或者驗收等問題，最後落成唔到；有啲就算落成到，因為租客唔夠，個場得小貓三兩隻行人，咁簽咗約嘅租戶就真係大鑊嘞。
蘭西聽業內人士講，針對呢個情況，𠵱家部份商場租約都開始加入條款，寫明一旦出現上述情況，業主要賠番幾多畀租客。咁樣對雙方都有保障。
由於內地有好多大型商場籌劃中，所以供應都唔細，個場掂唔掂好睇管理同質素，好似北京國貿中心同東方廣場商場，因為條件好、位置佳加上商場趨成熟，所以喺租金方面唔會有太大壓力。
市道旺，發展商唔使出動花招都賣到樓。喺地鐵上蓋嘅將軍澳蔚藍灣畔，成2000幾個單位話咁快就賣咗超過七成。負責賣樓嘅韓家輝，據聞已經開始忙緊返內地，搞公司喺廈門嘅樓盤，經常要中港兩邊走。
雖然信和喺廈門有幾幅地可以發展，但聽聞Mark哥（韓家輝洋名）今次負責嘅係中型項目，規模唔算大，得40幾個單位。聽講好似話由於近排內地樓盤本土銷情理想，信和呢個廈門新盤，好可能唔使嚟香港都賣晒。
樓市好景，代理行業頓時出現人手荒，為應付生意需要，各出奇謀去招聘人手，早前中原搞「中原之友」茶餐，重走去科大招攬人才。
對手美聯物業日前就去咗香港專業教育學院黃克兢分校，舉辦大型招聘會同就業講座，為準畢業生介紹地產代理行業嘅前景，同埋發展潛力。
美聯話即場接獲唔少準畢業生申請應徵，當中兩成想做前線職位、八成希望做後勤。
稍後，美聯重會去浸會、嶺南、理工同香港大學舉辦招聘活動㖭。
蘭西
電郵地址：
