荷李活型男尊尼狄普（JohnnyDepp）早幾年飛起姬蒂摩絲（KateMoss），繼而戀上當年人氣低迷嘅法國女星VanessaParadis，令好多人都𢱑爆頭。正所謂妻憑夫貴，Vanessa繼十年前做過Chanel嘅代言人後，最近又俾Chanel重召歸隊，同姬蒂齊齊開工，今次尊尼嘅新歡舊愛共冶一爐，夠晒噱頭。
當年憑一首《JoeLeTaxi》而竄紅嘅Vanessa，九一年幫過Chanel嘅香水CoCo做代言人，可惜好快就俾人飛起。無獨有偶，Chanel喺大前年推出CoCo新版香水時，就一直用姬蒂做代言人，可能為咗製造多啲話題，Chanel今季就搵埋Vanessa同姬蒂拍住上。
Vanessa現時嘅人氣雖然同當年差好遠，但尊尼近排去邊都帶埋女友，就算去到美國，人人都知佢係「尊尼狄普個女友」，搵Vanessa孖住姬蒂就梗係多話題啦！佢兩個新廣告啱啱出街，我羅拉見佢哋一個有型有格，一個端莊嫻淑，真係幾難分高下。