嗰邊廂Nokia搶喺CeBIT前公布百萬像素新機，呢邊西門子亦唔執輸，公布旗下首部130萬像素手機，宣告04年百萬像素手機戰幔正式揭幕！新機S65有齊大芒、藍芽、插卡等優點，令人期待！同場更有4部新機發表，高、中、低檔式式俱備，並且當中以三防手機M65成為另一注目焦點，相信04年好戲陸續有來！
記者、攝影：劉耀祥
S65（今年7月推出）
制式：GSM900/1800/1900三頻
顯示器：65,000色/132×176像素
鏡頭：130萬像素
功能：藍芽、GPRS、拍片、MMS、JAVA、40和弦
備用時間：250小時 通話時間：300分鐘
體積：109×48×18mm 重量：98g
西門子04年首炮發表新機，聲勢相當浩大，廣發英雄帖邀請世界各地傳媒，千多人出席其新機發布會，會場上擠得水洩不通，為的是一睹西門子早於網上發布的一眾新機，當中極具號召力的首推S65，單是以西門子首部130萬像素影相手機的牌頭已經甚有睇頭，加上其他4部新機，人頭湧湧並非無因由！
S65早於發表前數日已經於網上見到其芳容，黑色硬朗機身線條令人眼前一亮，只有109mm長度及18mm厚度，拎上手絕對唔覺大部，再睇睇其規格就更加叫人購買慾大盛，130萬像素鏡頭反應極為流暢，配上2吋大132×176解像度的6萬5色屏幕，最高可拍攝1,280×960解像度相片及15秒短片。而論質素計，相片的細緻度及光亮度單從肉眼已經可以睇得出明顯分別，雖然未有內置閃光燈，不過對於暗位一樣勝任，質素明顯比30萬像素影相手機高幾級。
除130萬像素影相鏡頭成為S65最多人談論的話題之外，其他硬件規格一樣叫人目眩，西門子首部採用RS（ReducedSize）格式MMC記憶卡作為儲存裝置，體積比一般MMC更細小，並且跟機更會附送32MB記憶卡，影相拍片就唔使就住就住。而行政人員市場亦都是S65的主要目標，所以EmailClient及與《Outlook》同步亦唔少得，加埋藍芽、USB介面及紅外線功能，資料傳送就相當容易。S65今年7月就會於歐洲、亞太區等地發售，令人期待之作！
S65主打行政人員市場，西門子同場的M65則瞄準各界運動人士，充滿運動細胞的外殼，以金屬外框包裹機身，鏡頭及充電位都有保護膠蓋，全面實現其「三防主義」；防水、防塵及防震功能，發布會上更即席表演「高空擲物」，兩米高講台擲落地都絲毫無損。M65外形夠Sporty之餘，功能亦完全切合，最特別是其「單車計程器」配件，只要連接於單車上的機座，就可以於手機畫面上顯示所行里數、距離之外，亦可記錄路線及預設行程。而且機內遊戲亦以體育、競賽為主題，完全是為運動而生。其他功能則有30萬像素鏡頭、MMS、JAVA等，今年第二季推出市場。
M65（今年第二季推出）
制式：GSM900/1800/1900三頻
顯示器：65,000色/132×176像素
鏡頭：30萬像素
功能：GPRS、拍片、MMS、JAVA、40和弦
備用時間：300小時
通話時間：5.5小時
體積：109×49×19mm
重量：104g
今次西門子共推出5部手機，除S65及M65之外，其餘3部亦都十分有睇頭，當中更有西門子首部摺機，更切合港人口味！
內置11MB記憶體
今年第二季推出
CX65配有30萬像素影相鏡頭及6萬5色彩芒，外形與S65有幾分相似，最大特色乃內置有11MB記憶體，可儲存更多相片。
周街養電子寵物
今年6月推出
以內置《Photopet》遊戲為特色的C65，玩法類似「他媽哥池」，其他功能則有MMS、JAVA、6萬5彩芒及影相鏡頭。
環形天線似Z200
今年第二季推出
西門子首部摺機，只重85g輕巧機身，加上機頂大大個環形天線，想玩JAVA、MMS都冇問題，鍾情細機用家又多一個選擇。
