港股噚日下跌159點，收報12816，成交增至243.7億元，扣除中石化（386）58億元成交上板，以及中芯（981）新上市帶來24.2億元成交，大市成交金額僅161億元左右，喺成交收縮嘅情況下，港股重要面對中電信（728）抽水壓力，加上外圍市況唔多好，港股短期難望轉好。
中芯首日上市，股價破底收場，收報2.475元，較招股價低8%，真係出乎阿虎意料之外，但最令阿虎大開眼界係有唔少沽盤來自包銷商德銀，排晒隊在2.475元沽出，但同時又在2.45元掛出一個大買盤頂到實。據黑客話，今次有大戶意外地獲超額分派，所以要即時沽貨，真係好耐未見過分餅仔分到咁論盡。
個別仙股繼續熱炒，其中發可換股債券畀和黃（013）同中策（235）嘅永安旅遊（1189），全日勁升55.6%至2.8仙，成交達2504萬元；安利時（339）炒高27.5%；駿陸（8206）炒高22.2%。但金勞詹曾入股的3隻仙股出現回吐，駿雷（070）跌21%；北方興業（736）挫22%；信用卡防盜（1051）亦跌6.9%。如果大家唔善忘，金勞詹同證監會曾經有過牙齒印，而證監有權過問異動股份的交易。不過Cookie話，未聽聞證監要求證券行提交上述股份交易資料。
永安噚日炒上，因為市場憧憬和黃將注入國內合資旅遊業務，但大家唔好忘記中聯系統（757）同東燃（432）嘅教訓，況且聽聞今次發換股債主要是重組現有債券，根本冇乜特別。
阿虎