艾列頓想踢世界盃嘅美夢幾乎肯定落空；點解會咁？就係因為國際足協（FIFA）突然改例，唔准球員無緣無故轉籍。
國際足協周三頒布緊急措施，講明球員喺轉國籍之前，必須證明同嗰個國家有關係，例如佢自己、父母或者祖父母係該國國籍，又或者佢本人喺嗰個國家住咗起碼兩年。換言之，本身係巴西人兼喺德國踢波嘅艾列頓、戴迪同李安度，將唔可能入籍卡塔爾。
有指國際足協突然正視呢個問題，係因為德國佬喺背後搞小動作，特別係雲達不來梅，佢哋𠵱家爭緊聯賽錦標，梗係唔想艾列頓走去踢國際賽啦；但點都好，𠵱家卡塔爾搵唔到啲巴西兵嚟幫手，最開心嘅，梗係同佢哋爭○六世界盃決賽周參賽權嘅日本、南韓同中國啦！
布力般領隊桑拿士終於證實操練中，俾約基踢傷後曾經有爭拗，但佢依然話此類事件經常喺練波時出現，唔係咁出奇。我求大俠認為，以約基今季表現，經已一直傳佢下季加盟富咸，今次事件肯定令佢續約機會微乎其微，高爾又話投訴桑拿士，下季唔見「黑雙煞」居多。
米杜士堡後衞米斯喺月初對伯明翰聯賽補賽後，抨擊對方球員沙維治；沙維治亦趁兩軍將於周末聯賽再碰頭前，數番對方啲衰嘢。最絕係沙維治講到冇嘢講，直情話米斯個光頭樣衰，建議佢戴番個假髮！最衰沙維治今周停賽，如果唔係兩個火爆人馬又走埋一齊，實有好戲睇。
愛華頓正式宣布取消季尾中國之行，理由係中超聯經已開鑼，但其實同中國贊助商季尾約滿唔再續約有關。但以愛華頓今季嘅成績，加上李鐵傷咗，到時未必上陣，我求大俠覺得訪華幾難收到宣傳之效。不過，贊助商約滿，最擔心都係李鐵，佢喺「拖肥糖」前景真係唔明朗。
古賓喺早排小馬輸畀馬刺之後，佢就公開鼓勵小馬嘅球員，對馬刺嘅茅王保雲「還以顏色」；重話如果因此被罰款的話，會幫佢哋畀㖭。講啲咁嘅嘢，梗俾人罰喇，噚日佢就俾NBA罰咗一萬美金（約七萬八港元）；不過比起佢最高紀錄罰五十萬美金，濕濕碎啦！