兩屆金像影帝湯漢斯（TomHanks）喺荷李活影響力驚人，佢主演嘅電影收得唔在講，監製嘅電視劇《雷霆傘兵》亦口碑載道，連投資嘅小本電影《我的大嚿婚禮》都賣個滿堂紅，但阿湯自從○二年尾嘅《捉智雙雄》後，都好耐冇同觀眾見面。
今年阿湯就有三部戲上畫餵飽影迷，呢個月二十六號佢首次夥拍高安兄弟（TheCoenBrothers）嘅《TheLadykillers》率先登場。
呢部重拍五五年同名電影嘅黑色喜劇，係講阿湯扮演嘅教授集齊一班賊計劃打劫賭場，佢哋租咗個阿婆一間房，點知單嘢俾阿婆識穿，成班人惟有諗計隊冧阿婆。
阿湯繼《捉智雙雄》後，再同史提芬史匹堡（StevenSpielberg）合作嘅《TheTerminal》會喺六月上映，佢飾演嘅東歐移民會邂逅嘉芙蓮薛達鍾絲（CatherineZeta-Jones）扮演嘅靚女空姐。
十一月阿湯同《劫後重生》老搭檔金像導演羅拔湛米基斯（RobertZemeckis）炮製嘅《ThePolarExpress》，係今年最矚目嘅作品。呢部係一億五千萬美元（約十一億七千萬港元）動畫巨製，入面阿湯嘅車長造型同真人冇乜分別。