郭羨妮、莫文蔚和陳妙瑛前晚以性感裝束在灣仔會展出席晚宴，其中陳妙瑛身穿一襲Versace晚裝，她表示麥當娜亦擁有同一款衣裙，莫文蔚則身穿corset，盡顯驕人身段。郭羨妮亦不輸蝕，穿上低胸裝的她亦謀殺記者不少菲林。
郭羨妮、莫文蔚、陳妙瑛和陳豪前晚往灣仔會展出席莎莎國際控股的周年晚宴，三位女將各以性感服裝亮相，使現場儼如選美會一樣。
郭羨妮穿上由何國鉦設計的低胸露背晚裝，莫文蔚身穿購自歐洲的胸衣，而與旗下產品廣告童星瑤瑤一同出席宴會的陳妙瑛，亦穿上桃紅色的Versace晚裝，她說：「我呢條裙連麥當娜都有一件，我早排放假暴飲暴食，肥咗五磅，𠵱家再搏殺工作又要見人，所以咪努力keepfit囉，瘦番五磅先着得落呢條裙咋。」
有報道指郭羨妮和溫兆倫拍拖後，聲勢有下滑迹象，連廣告商亦有意飛起她另覓代言人，故她最近拍攝性感照以挽救人氣，郭羨妮說：「廣告續約問題我交晒畀經理人處理，同TVB就重有兩年約，其實我着衫係睇場合嘅，不時都會有少少性感㗎啦，我嘅底線係着三點式。男友從來冇干涉我工作，如果啲性感相影得靚嘅佢都唔介意，不過我唔想次次都講感情事，只想集中精神工作。」
另外，陳豪前晚大受女性歡迎，紛紛爭相跟他合照，擾攘達半小時。問陳豪對於無綫力捧吳卓羲等六名新晉小生，對他來說是否威脅？他笑說：「點會呢？不過我老人家點同型仔後生比呀？」
採訪：顏英儀 攝影：林德雄
