港股又再跌過，基本上人心虛怯，大市弱勢未除。3大藍籌宣布業績，期指臨尾插到最低收，大低水110點。恒指噚日低見12787，雖守在上周五的12730之上，但成交大增，沽壓唔輕，若然一兩日內未能上番100日線（12852）之上，下試12500支持機會好大。
中移動（941）宣布完業績，午市立即散咗，結果低收23.9元，跌3.4%，亦都拖累大市跌勢轉急。中移動03年（12月年結）獲利355.6億元人民幣，升9.1%，每股盈利1.81元人民幣，無疑係略為低於市場預期，但基金認為其派息0.2元唔理想，大舉沽貨，結果單係中移動，已令恒指下跌54點。
長和系收市後宣布，業績則比市場預期為佳。和黃（013）去年獲利143.8億元，升0.1%，每股盈利3.37元，若不包括特殊溢利及3G開辦虧損，純利為151.5億元，升25%，市場則預料不計特殊項目的盈利為120億至135億元。至於長實（001），獲利98.1億元，升12%，遠超出市場預期的70億至94億元，每股盈利4.24元。以現股價計，和黃PE17倍，長實15.8倍，由於長實今年地產收益將會大增，兩者擇一，長實較吸引。
中芯（981）係繼TOMOnline（8282）之後，另一隻近期首日就跌穿上市價嘅大熱新股，呢半年嘅IPO熱潮，散戶賺頭蝕尾，都應該搵到唔少。中芯雖然不濟，但上個禮拜上市嘅濰柴動力（2338），就馬力十足，升到14.9元，創出新高價。濰柴上市後，連續幾日都見基金一路收集，有消息話濰柴嘅升勢會係第2隻比亞迪（1211），後者上市價10.95元，今個月初見29.9元，升咗173%。
濰柴係中國最大的大功率高速柴油機生產商，佔內地重型汽車7成市場，並計劃開拓客車、工程機械以及發電設備等3個新市場，03年（12月年結）獲利2.77億元人民幣，04年保守估計可升至4億元人民幣，每股盈利1.23港元（已就新股作出調整），05年更可達1.38港元。以04年14倍PE計，股價已可見17.2元，以上市價10.5元計，升幅亦只64%。
郭兆誠