下個月一號就係哥哥張國榮逝世一周年紀念，哥哥一班忠實fans，除咗一號當晚會喺哥哥自殺身亡地點——中環文華東方酒店舉行大型悼念活動外，香港旅遊發展局更會喺二號招待哥哥一班日本fans，欣賞哥哥有份參演嘅四部香港電台電視劇，包括《我家的女人》、《烟飛烟滅》、《沙之城》同《女人33》。
自從哥哥過身之後，佢嘅fans紛紛四出搜購哥哥昔日嘅唱片同影碟，但哥哥當年幫港台拍嘅電視劇，fans只能夠等重播先至睇到。馮仁昭聽聞香港旅遊發展局知道日本fans好想翻睇哥哥嘅作品，所以向港台借咗呢四部劇集，安排喺下個月二號喺香港電影資料館招待四百位fans欣賞，咁樣做除咗滿足到fans外，重可以促進香港旅遊業！
哥哥喺八一年嘅《沙之城》裏面飾演小沙彌，同學生講佛學同人生，頗具禪味。
劉德華一向鍾意變臉藝術，噚日網上消息話嚟緊四川會舉行一個《三星堆國際面具節》，嗰晚重請咗劉德華去唱《中國人》，噚日馮仁昭問過華仔，佢話冇應承過會出席，到時佢應該忙緊拍馮小剛新戲《天下無賊》。其實網上成日有好多佢嘅假消息流傳，華仔話最怕有人利用佢個名去呃人，佢自己個心都唔舒服。
葉璇日內會到無錫拍攝內地劇集《天下第一》，重會同郭晉安同劉松仁合作。葉璇喺劇中扮演一名打女，佢早前拍劇整親腳，最近先好番，佢話：「我好開心可以同佢哋合作，我都好擔心隻腳，惟有自己小心啲，始終打女都算係新嘗試。」馮仁昭見到葉璇咁搏，都有啲替佢擔心。
女子組合S.H.E近日喺台灣接拍咗EuroStar嘅汽車廣告，廣告商重應承咗送三部車畀佢哋，令三位成員興奮不已，Ella重用國語話：「我們雖沒有駕駛執照，但為了可開新車，會積極考牌，屆時還會帶同小狗往郊遊。」S.H.E重興高采烈咁討論要乜嘢顏色，又話將三部唔同色嘅車拍埋一齊，聲勢一定好浩大㖭！
羅浩楷日前因心痛入院做手術，問到薛家燕（好姨）有關楷哥嘅最新情況，好姨就話：「佢重未出院，啱啱做完手術好成功，我諗佢呢一、兩日就可以出院。不過公司應該唔會咁快安排工作畀佢做。」問到好姨知唔知楷哥重喺唔喺深切治療部，佢話：「應該就唔係喇！」馮仁昭都希望楷哥早日完全康復，積極投入工作。
沈殿霞（肥肥）同新加坡名主持張永權傳緋聞後，男方之前喺新加坡接受訪問，就稱肥肥係佢嘅紅顏知己，佢重同肥肥阿媽好老友，成日攻打四方城。之前張永權喺新加坡買咗二千幾呎嘅大屋，𠵱家裝修緊，啲人就估佢同肥肥築愛巢，不過張永權就否認，話間屋係佢二○○○年買落嘅，當時佢未識肥肥喎。
無綫嘅裁員風聲搞到雞犬不寧，其實好多無綫出身嘅藝人，轉咗行後都有不俗發展。好似黃澤鋒咁，佢之前開咗間餐廳，起初有聲有色，不過舊年因沙士同經濟問題曾經停業，點知唔夠一年佢又再嚟過，佢話之前舊舖已經租約期滿，所以搬新家，聲言要「再起風雲」，下星期搞開幕禮，重請咗曾志偉、鄭伊健同鄧兆尊等去開party㖭。
