隔晚歐美股市掂檔，港股則冇運行，恒指又散近160點，歸咎於午間中移動（941）派成績表，多賺9%，市場唔收貨，中移動跌3.4%。其他國內電訊股亦唔妥，聯通（762）散4.4%，而中電信（728）亦因可能大抽水，跌3.5%。
聯通下周四派成績表，就算畀各大行預測平均多賺18%，PE都接近22倍，都高過中移動同中電信好多。睇嚟聯通都會面對沽壓，聯通Call輪可以避就避。想喺聯通下跌中買Put輪搵銀，冇計，因為聯通冇Put輪。
長實（001）收市後派成績表，多賺12%，和黃（013）叫做多賺0.1%。兩公司盤數算係好過分析家估計，不過無論Call輪與Put輪，最好暫時咪沾手住。Call輪若然係一兩月內到期者，有幾個巴仙溢價，溢價會縮得好快，輪價隨住正股上落一兩蚊，波動急劇。噚日和黃Call輪9066，最高8.1仙，最低4.5仙，可以相差高達80%，埋單價5仙，前日上車嘅，一日唔見38%。至於Put輪，溢價亦唔見吸引，揸Put輪須提防相關正股有技術性反彈。
大藍籌硬淨嘅有九倉（004）與太A（019）。九倉Call輪9086今年11月到期，輪價48.5仙，溢價1%，槓桿率4.6倍。太ACall輪9372喺6月到期，輪價41仙，溢價1.4%，槓桿率12.7倍。兩隻輪數據都唔錯，但揸落未必有得賺，因為個市陰霾密罩，強勢未必可維持。
章盛