住宅樓市興旺，代理隨時要做到三更半夜至收得工，原來測量師行都唔好得幾多，聽中原測量師行董事總經理黎堅輝講，佢哋𠵱家每日做嘅口頭估值都有成二千宗，啲文件工作就被迫留番收工之後至開始搞，咁有乜辦法唔要加班呢？佢話最夜試過做到凌晨十二點至收得工。
由於唔夠人手，所以要請多十個人，等公司員工增至二十幾人，先至可以應付到𠵱家嘅工作量。不過，佢估計公司嘅營業額今年就可以有兩成增長。
中原因有代理部門，估價時佔優勢，可以比同行更貼市，銀行唔係咁熟悉，所以好多都主動接觸，要求參觀中原嘅運作模式，希望了解多啲。
用咗近四十億買入中環國際金融中心十四層寫字樓嘅金管局，舊年年底開始遷入新總部，用唔晒嘅樓面，正喺市場招租，有部份樓面已租出，市場估計每呎租金超過三十蚊。
蘭西從土地註冊署資料睇到，重有樓面未用盡嘅金管局，卻同另一個發展商太古租寫字樓，簽定租約，承租鰂魚涌電訊盈科大廈約一萬四千幾呎，租期三年，由02年11月起，據講每呎租金二十蚊，好似用嚟做後勤辦公室。
金管局有自己地方唔用，租人哋寫字樓，無他嘅，自己地方租貴嘛，成三十蚊呎，租畀人重有着數。
喺正紅磡海傍嘅海名軒，名正言順攞海景做賣點。物業又喺正海逸酒店隔籬，長實就向住戶提供酒店式住宅服務，吸引買家。
買得起呢幢摩天大廈嘅業主，非富則貴，發展商話，𠵱家除咗可以搭車去睇樓外，重可以坐船去睇樓，皆因海逸酒店前面有個私人碼頭，當年國家主席江澤民嚟香港，都係喺呢個碼頭落船。
配合豪客有機會經海路去睇樓，長實話特意開放呢個私家碼頭，重美其名為皇家碼頭。雖然噚日天氣麻麻哋，為讓一眾傳媒感受呢種坐船睇樓滋味，長實同美聯搞個海上記者會，帶大家暢遊維港，重親身試吓個私家碼頭。
平時開記者會都唔多正經嘅恒基營業部總經理張炳強（當奴），噚日出席港置嘅記者會嗰陣，忽然變得好嚴肅，原來係為咗啱啱喺噚日凌晨，執勤途中殉職嘅交通警員而覺得惋惜。佢重話，以往都有個習慣，每次有紀律部隊人員殉職，都會捐些少錢，寫封慰問信畀佢屋企人，以表心意。
紀律部隊人員經常為大眾服務，作為一個小市民，每次聽到佢哋有咩損傷，個心都會唔安樂，不過真係會主動做啲嘢，伸出援手嘅人，就冇幾多個。
香港樓市火熱，市場指升勢未完，唔怪得連海外人士都留意本港嘅樓市。美聯物業助理區域經理邱鵬話，一名從未踏足本港嘅澳洲華僑，喺朋友口中聽到香港樓市有景，於是喺網上搵資料，再聯絡美聯幾區，攞完料重約定埋日子，搭飛機嚟香港睇樓，但因佢係打工一族，財力有限，手上資金唔多，所以只能揀啲細價樓，最後揀咗西灣河同筲箕灣區，買咗兩個單幢樓單位，盛惠二百三十二萬。
呢個澳洲客用一一六萬買入西灣河千禧閣高層B室，四三九呎，另一個係筲箕灣海灣華庭高層C室，三七二呎，同樣係一一六萬。將會委託信託公司幫佢放租同管理。
買家揀呢度係因為港島區樓價較保值，而且單位近地鐵站，加上樓齡較新，唔超過五年，大堂又保養幾好，出租都容易啲，果然做足功課。邱鵬估計回報率應有五厘六。
買家係一名三十幾歲女士，喺澳洲擁有自置居所，與家人同住。今次嚟港一個禮拜，買完樓就趕返祖家。
蘭西
電郵地址：
