美國搖滾歌手葛妮洛芙（CourtneyLove）一向都神神化化，前日佢為咗宣傳最新個人大碟上去《大衞牙擦騷》嗰陣，居然喺訪問期間突然跳上主持人大衞利達文（DavidLetterman）張枱度揭開件衫露胸，嚇到我大口羅拉都冇眼睇！
葛妮早前被控兩項藏有未經處方藥物而遭起訴，搞到佢心煩意亂，不過佢仍然要為隻個人大碟《America'sSweetheart》四出宣傳。好似前日咁，葛妮去到紐約接受名嘴大衞利達文訪問期間，講番點解佢隊樂隊Hole要拆夥，點知葛妮講得好哋哋，又突然嚟料。
據講當時大衞喺訪問期間句句窒到應，不過葛妮一啲都唔介意，重不時儍笑。點知喺大衞冷不提防之時，葛妮突然擒上張枱，稱聲要益吓大衞，喺呢個時候，葛妮背住鏡頭，向住佢揭開件衫，大衞俾佢嚇到目瞪口呆，聲都唔識出。之後葛妮又返埋位，一副乜都冇發生過嘅樣，搞到大衞唔知好嬲定好笑。
其實葛妮行徑向來古古怪怪，好多人都歸咎佢嘅特殊嗜好累事，不過葛妮猛話自己冇濫用藥物，至於真相係點，就得佢自己先知。