廣告界老鬼C傳真一頁紙嘅各大報章嘅讀者Profile畀左丁山，附帶說明云：「畀你落廣告之時，有參考根據。」老鬼C與左丁山以前攬頭攬頸多年，近幾年因為左丁山冇廣告生意，來往漸少，估唔到佢重記得我，唔通因為佢都俾人「卒數」，所以諗起左丁山呢個窮account？
呢份讀者人數、背景資料，當然係唯一權威公司嘅調查數字，左丁山睇咗一輪，發覺在二○○三年底（資料截止日期），《蘋果日報》雖然以銷路及讀者人數計，都屈居第二（按，以ABC核查計，銷量第一），但有幾樣讀者第一：（一）具備大專教育程度（Post-secondary/University）者，人數最多（三十三萬五千人）。（二）以職業計，PMETP讀者（即專業人士、商人、行政人員、老闆等）有十四萬一千一百人，全港最多。（三）以家庭收入計，月入二萬五千及以上者，有四十三萬六千人，全港最多。（四）以個人收入計，月入一萬五千元及以上者，有二十九萬七千人，全港最多。
初步結論就係，如果廣告商賣廣告，目標對象以全港收入最多、教育程度最高、職業最精英嘅一批人。《蘋果日報》就係媒介嘅無敵首選，諗都唔使諗，諗嚟諗去而唔喺《蘋果》落豪宅廣告之人，你話不涉及其他因素？呃左丁山初出道咩。阿叔以前逐間4A's廣告公司拍門挨廣告，成日遭遇白眼，佢哋嘅冷酷答案就一定係：「對唔住，你啲讀者Profile差幾皮，人數又唔夠多。」大概呢一代嘅地產廣告係睇眼色，唔眼數字嘅。