大陸汽車股去年一度威震四方，連帶生產汽車零部件的北泰創業（2339）表現亦相當出色。
小初去年多次推介此股，但踏入今年以來，北泰股價由高位3.10元回落，幅度唔算細，而股份交投亦轉淡靜。不過經紀黃話，不宜睇得北泰太淡，估計公司在未來數周，有利好消息出現。
北泰近兩日表現唔差，噚日最高2.725元，收2.65元，升1.92%，成交股數77萬股，金額206萬元。
經紀黃又話，北泰有唔少基金坐咗貨，有間美資基金揸咗超過10%股權，如果佢哋都未願轉身，北泰又邊會咁快炒完？日前有間美資行，幫北泰出咗份報告，估計北泰未來業績會好正，但盈利上升理由就冇新意，不外乎係產能增大，同埋加強生產增值產品等。但據講北泰稍後可能有動作跟尾，收購大陸一間汽車零部件生產同業。
此外，最值得留意係上年10月初上市的北泰，到下個月初就上市夠6個月，可以批股集資。
慕容小初