短線遊：<br>遠足冷門地大欖三徑睇屯門全景

短線遊：
遠足冷門地大欖三徑睇屯門全景

估唔到屯門市中心一樣有山行，今日就帶大家到大欖郊野公園遠足，起點何福堂書院，依附近山徑上山，依次序行麥理浩徑第10段、屯門徑第2段、虎峽谷徑，高處睇屯門全景，最後經藍地水塘下落妙法寺結束旅程，全程4小時，輕鬆易走。
記者：陳震霖
攝影：陳盛臣
模特兒：David、Ruby（StarAsia）



遊訪井頭村中村
起步點屯門何福堂書院，向杯渡路方向走5分鐘，左手邊大馬路會出現麥理浩徑第10段終點。我哋終點當起點行，穿過井頭村中村，沿引水道上山，兩旁都係古舊村屋，林蔭擋住猛烈陽光，路顯得特別好行，汗都唔出多滴。村屋對開種滿香蕉同木瓜樹，不過千祈咪亂摘，手多多門口狗實向你吠到拆天，15分鐘後，麥理浩徑就會接上屯門徑第2段，跟路標指示走就一定唔會迷路。
行多兩步，見涼亭，如果平時少行山，不妨小休片刻，休息完唔好走住喎，涼亭對開有個迷你觀景台，遇着天清氣朗，差不多成個屯門市一眼望清，由左至右，山景村至兆康苑一覽無遺。

■屯門徑涼亭對開觀景台，送你無敵屯門全景。


石上留字指路
30分鐘唔使行完屯門徑，再接虎峽谷徑。虎峽谷徑大部份係沙石地，比之前麥理浩徑同屯門徑石屎路難行少少，但山路只係逐漸斜上，慢行唔成問題，上到山脊又有另一個涼亭，建議自備小食，風涼水冷野餐一流。涼亭位置有分叉路口，一邊上九徑山，一邊落虎地村。

■半熟香蕉，千祈咪手多亂摘。

■路口有路標，清晰指示麥理浩徑轉入屯門徑方向。

■有心人喺石上寫上大字，指示虎峽谷徑方向。

■落虎地村前有個涼亭，面積雖小但納涼一流。

藍地水塘主壩雄偉
下山路十分舒服，右手邊有條直通藍地水塘嘅小溪，清風送爽，趁夏天未到，𠵱家行山就最正，偶爾小溪會接上大水池，大家千萬要小心，唔好太過接近，2年前大水池就發生過遇溺悲劇。跟住水管行就會落到水塘，藍地水塘規模唔算大，但主壩一樣氣勢磅礡，影完靚相，堤壩盡頭有小路落山，經石礦場去福亨村，落藍地妙法寺參拜佛祖。



妙法寺觀天花壁畫
妙法寺始建於1950年，1980年重修完畢，有別於一般小型寺廟，寺院3層高，分別係天王殿、大雄寶殿及藏經閣，佔地7,800平方呎，高過100呎，遠望埋去好搶眼。入廟除咗拜神，重可以參觀寺內糅合中泰文化嘅浮雕壁畫，幅幅璀璨奪目，講述佛祖釋迦牟尼幾時出世、如何得道、如何傳揚佛法等一生故事，就算你唔係佛教徒，壁畫都一樣睇得明。

■橋樑橫貫主壩，氣勢磅礡。

■水池旁邊有塊「安樂椅石」，行過不妨唞唞。

■清溪伴行，用冰涼溪水洗洗面，精神一振。



寺院即將擴建
妙法寺正門有亭台樓閣，雖然小橋流水欠奉，不過都有一個錦鯉池同人工石洞畀大家影輯沙龍。二十幾條錦鯉喺度好食好住，條條都生龍活虎，而穿過一個人工石洞，柳暗花明又一村，又有兩張石枱畀大家小休。
𠵱家嘅妙法寺重擴建緊，大雄寶殿隔籬即將興建一幢全新綜合大樓，糅合傳統同現代化技術，將來落成嘅大樓將會全幢落地玻璃，外形據講似一朵水晶蓮花，裏面再起多個大雄寶殿，供奉8米高釋迦牟尼佛像、舍利佛同目犍連尊者，相信將來嘅妙法寺一定會成為熱門旅遊勝地。

■畫上12生肖嘅天花板畫，本身已經係一件藝術品。

■妙法寺主樓都幾金碧輝煌。




妙法寺（24618567）
地址：新界屯門藍地青山公路18號
開放時間：9:00am至5:00pm
齋菜收費：每位$75，團體每席$700（每席10至12人，至少訂4席），7日前預訂。
齋菜供應時間：星期一至日12:00nn至3:30pm

■人工錦鯉池布置精雅，水池旁一棵羅漢松蒼勁有力。

■佛門清靜地，石枱小休，唔好大聲吵鬧。

補給站
參拜完佛祖，不妨去藍地大街醫肚，推介價廉物美嘅「葵記茶餐廳」，碟頭飯（$26）大碟到飯同餸都要分開上，肯定飽肚；女仔胃口小，叫番碗足料車仔麵（3餸連飲品$17），差不多20款配料畀你慢慢揀，食飽至出市區都唔遲。

葵記茶餐廳（24616321）
地址：新界屯門藍地大街3號

交通
去程：葵芳地鐵站巴士總站乘67M巴士（$7.8），屯門何福堂書院下車，依山路上麥理浩徑。
回程：妙法寺門前乘63X巴士（$13），返回旺角地鐵站。