上星期八方講過地鐵公司大手筆送認股權畀新任行政總裁周松崗，噚日地鐵出咗最新嘅年報，入面有多啲資料，八方梗係同大家八卦吓。原來地鐵送畀周總裁嘅唔係認股權，而係七十萬股地鐵股份，佢有權喺三年合約期內分批收取，按噚日地鐵收市價計都值成八百四十七萬元。呢批股份係邊個畀嘅呢？通唔通呢？
周總裁呢項權益同其他高層唔同，因為之前地鐵高層獲發嘅係認股權，佢哋可以喺合約期內以每股八點四四元認購地鐵股份，若地鐵股價向好，佢哋就可以賺取中間差價，而周總裁就一個仙都唔使畀，重有權收等值現金。
周松崗舊年十二月至返工，年報顯示原來佢基本月薪有五十六萬元，計埋花紅就袋咗六十八萬元，計落年薪逾七百萬元。至於主席錢果豐雖然屬非執行主席職位，但做咗半年亦收一百萬元，佢加埋周總裁，可能隨時多過以前蘇澤光一人身兼兩職時支嘅八百萬年薪，所以主席同行政總裁職位分家呢啲改善公司管治嘅做法，唔會冇代價嘅。
（圖）周松崗年薪逾七百萬元。
傳真︰2623-9278
電郵︰