前晚鄭秀文（Sammi）第一日為新片《龍鳳鬥智》開工，她否認和經理人郭啟華不和，並斥責有關她要飛起對方的報道極度無聊。合演的劉德華則在開工前，偷閒在南華會打保齡，還讚Sammi瘦得幾靚。
劉德華和鄭秀文前晚在南華會拍攝電影《龍鳳鬥智》，前晚是Sammi首日開工，華仔在晚上九時許已到達，但因為凌晨十二時半才拍攝他的戲份，他便和一班朋友在南華會打保齡球。
Sammi十時許坐保母車到達現場，看來心情不俗。有報道指Sammi不滿經理人郭啟華安排太多工作，打算換經理人，由助手阿爽和其胞姊處理其事務，對此報道Sammi兩度重複說：「極度無聊。」
華仔前晚事前不知Sammi有份開工，對於Sammi暴瘦，華仔力撐說：「唔係呀，幾靚呀，肥又話肥，瘦又話瘦，我啲朋友都話我瘦，叫我肥番啲，咁我都唔敢啦，一陣又俾人話我中年發福。」
有報道指華仔和杜琪峰不和，相隔兩條球道打保齡不傾偈，又有傳不和是因為Sammi經常度不到期開工，對此華仔否認說：「梗係唔係啦，Sammi度唔到期關我乜嘢事，我都唔理呢啲嘢。傳我同阿杜不和都唔係第一次，根本就唔會有咁嘅事發生，我同阿杜太熟，雜誌寫乜都唔會影響我哋感情，我哋合作得好開心，每次我都會有得着。」
華仔續說：「阿杜打波都ＯＫ㗎，我哋係同一個老師，重約戰九月，大家操半年，我哋當晚打招呼有傾偈，阿杜重叫我唔好搞佢，我平時去打波見到佢，都會撩佢打牙骱戰，但佢唔肯。」
對於陳冠希日前被兩名少年當街毆打一事，華仔表示自已亦試過俾人撩，至於如何處理，他說：「套用Edison嘅說話，叫啲後生仔唔好咁衝動，畢竟我哋都後生過，唔好意氣用事。」
採訪：楊潔雯、陳梅香 攝影：陳烱威