愛國學校嘅香島學生天水圍出鉸剪拮傷涉嫌社團人士嘅血案，學生已經認罪。呢名香島學生，雖然係出於自衞，但唔應該以暴易暴。當局揸正嚟做，對正確教育下一代真係好重要。
講開以暴易暴，或者護法老人都覺得李柱銘被左仔侮辱得太過份，呢兩日護法老人開始有少少溫和收斂，苦口婆心話香港民主步伐唔可以太快，要照顧我國國情，到二○一二年之後先至諗。護法許崇德老人，曾經破口大罵「支聯會」（實情係搞錯，應該係長毛嘅四五行動）將佢幅玉照打叉而侮辱佢肖像權、人格權、名譽權，隔咗一日亦轉性，口氣開始流露出極為珍貴嘅人情味，佢話：中央唔係欺侮大家，若然中央想蝦港人，就唔會送咁多大禮，佢又話：中央想香港人顧全大局，忍一忍。喺佢張相打一百個叉，都冇所謂。最重要係七百萬人都有幸福。充滿感性，直頭賺人熱淚喎。
許老人唔知係咪睇咗八方日前所講：去年七一遊行，董特首有一張海報，影住董老塊面，俾人用個蛋糕係咁撻。當日八方高度讚揚阿董好有器量，肖像權俾人玩到咁盡，一句聲冇出，七一之後重笑騎騎接見民主派㖭。有董老呢啲EQ咁高嘅特區領導人，幫香港人屢次向中央攞嘢，忍辱負重到今日，俾某小知識分子報章好無理咁同佢改個花名叫做「董伸手」，阿董亦冇公開反駁。呢七年以來，阿董確係做足「兩任特首」，兩任就係「任鬧」同「任督」，展示驚人嘅SM忍痛力，香港嘅言論自由先至叫做冇乜影響。今次蕭蔚雲、許崇德等老人來香港先而大罵，後而和顏悅色咗啲，可能係受咗絕少以暴易暴嘅阿董嘅胸襟感召，所以凡事要由積極嗰邊睇，阿董繼續做落去，對國家領導人如安民之流嘅言行，係有正面嘅教化影響。
愛國學校學生嘅以暴易暴行為，將受制裁，但香港自稱愛國嘅極左分子呢兩個月瘋狂嘅語言暴力，甚麼漢奸賣國賊，日日惡婦罵街，搞到香港好似一座超級屠房，腥臭難當，佢哋點解可以逍遙法外？要忍嘅係港人，定係呢批維園阿伯？點解許崇德唔訓示佢哋顧全大局？
傳真︰2623-9278
電郵︰