噚日長毛梁國雄去「護法」許崇德嘅座談會踩場，搞到主辦活動嘅鄉議局好頭痕，為免七老八十嘅許老俾長毛激親，一直好小心保護阿許公公，連會場所在嘅九龍會會所正門都封埋，幾十位參與座談會嘅鄉議局成員惟有兜路行。
咁都不特止，保安人員超級盡責，打雀咁眼昅住入𨋢嘅人。十八鄉鄉事委員會主席梁福元一身西裝骨骨到場，行入𨋢時，竟然俾保安留難，佢表示自己係鄉議局成員。唔知係咪佢個樣太過斯文，一位保安竟然寸佢一句：「你係鄉議局嘅人？唔似喎！」梁福元即時面黑，重搞到要出示證件。
八方橫睇豎睇，梁福元先生點睇都唔似示威者，渾身純樸嘅新界農民鄉土氣息。咁都唔似係鄉議局嘅人，唔通梁家傑先生至似咩？
（圖）十八鄉鄉事委員會主席梁福元西裝骨骨，咁都被懷疑係示威人士，都算無辜。
傳真︰2623-9278
電郵︰