好多人都有一個夢，就係到咗八十歲之時，能夠好似蕭蔚雲、邵天任、許崇德三位老人咁健康，仍然唇紅齒白，聲音雄壯，能夠厲言疾色，尖叫「我的人格權、肖像權在哪裏！」最緊要嘅重係，大嗌之後，有唔少孝順仔女拍掌叫好，熱烈向自己祝賀！
三位老護法越嗌越興奮，弄不清「四五行動」與「支聯會」之別，更加冇解釋到：（一）《基本法》所講嘅「循序漸進」究竟如何「循序」、如何「漸進」？究竟係唔係十年之內唔好郁，十年之後先至郁？或者等到二○四七先至係「漸進」？唔該你哋講解。（二）「長期繁榮穩定」與「民主普選」是否相排斥？有民主普選，香港就冇繁榮穩定？如果你話係嘅，請舉出例子及理論說明之？乜嘢叫做「長期繁榮穩定」？計唔計經濟循環周期？美國每四年或八年換一次總統，算唔算穩定？以前蘇聯史大林時代，係唔係穩定過美國？人人都喜歡長期繁榮穩定，就如人人都喜歡做畢菲特，講得多就係玩弄語言魔障，必須在邏輯上講清楚。（三）何謂「顧全大局」，大局是甚麼？你唔好話心中有數呀！我冇數㗎！假如你講到明話一日中央冇普選，香港就唔准有普選，呢個就叫做大局咯喎，我都會明白嘅，但如此一來，就係一國一制啦，講白啲，好痛苦㖭！（四）何謂「真民主」？許崇德先生由國民黨統治大陸時期至大鳴大放、反右傾翻案風、批林批孔批鄧以至如今，甚麼時候你見過真民主，請從理論及實例上說明之。
甚麼護法講解《基本法》，只係讀口號式政治文章，不能以理服人，港大城大法律系學生，學嘢嘞！