房署喺公屋減租一役打輸官司，前日一口氣推出五個減租方案畀大家諗，減幅由一至四成不等。唔好以為班公屋居民貪得無厭，覺得減少少唔夠喉，噚日打上電台節目嘅公屋居民，就幾乎一面倒咁支持房署，話減一成其實都好足夠，唔少人甚至覺得有公屋住已經好幸福，重叫啲議員唔好搞咁多嘢。
住公屋嘅唐太話，一家四口月交九百蚊租，房署就包住包維修，換轉住喺私樓，真係唔會咁幸福。梁女士就話，減租一成都已經好夠，陳先生重老實到話減佢租真係受之有愧，反而住私樓嘅老人家吓吓要自己拎錢出嚟維修，就真係慘情。不過，都有公屋居民黃先生認為，房署應該有個可加可減嘅訂租機制，先至叫做公道喎。
傳真︰2623-9278
電郵︰