在一片綁架鬧劇聲中，昨日關心妍（Jade）由唱片公司同事及保安人員共七人護航出發到機場，前往美國學藝，不過專程送機的fans卻被此情此景嚇窒，一律不敢埋身，幸Jade見狀即主動上前親近fans。
關心妍連日來雖被綁架鬧劇困擾，不過昨日她終於成功出發到美國洛杉磯跟隨老師學唱歌，而唱片公司為安全起見，除派出四名唱片公司高層及同事陪伴外，更邀請三名保安人員在赤蠟角機場中為她護航。
昨午一時許，Jade由兩名女助手接送，帶着三篋行李乘坐公司保母車，從羅便臣道寓所出發到機場，而她抵埗後，再有兩名公司高層及三名保安人員在場等候，保安更以「品字形」人牆保護她，故令現場六、七名fans不敢埋身。反而Jade主動走到fans身邊，跟他們拍照留念。
昨日Jade平平安安出發赴美，對於前日有可疑人物在其唱片公司樓下徘徊，她說：「佢係咪路過咋？不過我唔知佢想點玩？噚日我屋企冇再收過可疑電話，看更已經好留意，一見有陌生人喺樓下就會即刻通知我。但可能佢都曝晒光，落唔到手，要cancel啦。」
問Jade會否擔心揚言要綁架她的男子精神有問題？她說：「都擔心㗎，驚都控制唔到㗎，搞到我𠵱家對身邊嘅人都懷疑，我噚日本來想去備案，但今日都走咯，費事搞大件事啦。」而Jade表示除有女助手陪伴赴美外，抵達當地後還會購買胡椒噴霧、防狼器及電棒傍身，但她則對獨自留港的母親的安全甚為擔心，她說：「我驚啲人搞我唔到，搞我媽咪就唔好啦。」
採訪、攝影：娛樂突發組
