搭郵輪，悠閒、舒適，兼且浪漫！近一年多咗港人玩，不過一啲都唔平。
恒基地產睇到個潮，就搞「嘆世界郵輪假期大抽獎」。喺指定日子，到十一個商場，消費一百蚊，就可抽獎。
頭獎係銀河號十三日十夜地中海之旅，先飛去意大利掃一輪名牌至上船，遊希臘、馬爾他、西班牙、蒙地卡羅，然後抵羅馬再補購名牌，返香港，價值七萬。睇見郵輪咁靚，搞到蘭西心郁郁。
二獎係價值五萬嘅加勒比海公主號十一天九夜加勒比海之旅；三獎及四獎係雙子星號遊台灣及沖繩。住宿機票，由發展商送出。其他六個獎品，係雙魚星號海上假期之旅。
今次抽獎，總值二十萬。之所以咁重手，其實反映商場競爭好激烈。近年每逢大時大節，各大商場都裝身配合氣氛，重大送獎品同優惠，無非都係想吸引多啲消費，可見商場認真唔易做。
近排樓市咁旺，地產代理生意興隆，佣金梗係收到手軟啦！搞到啲打工仔鬼咁羨慕，唔少新人重因為咁而做地產代理。
原來中原地產執行董事陳永傑，當年都係因為見到樓市好景，先決定投身呢行。
佢話八十年代初，自己二十一歲，買咗第一層樓，係沙田河畔花園，當時只係十一萬，但息口就成二十幾厘。
點知，短短四年後，發覺個單位升到二十六萬，有一倍多，頓時覺得地產呢行有得做，順理成章走咗去做代理。
86年加入中原，唔經唔覺，一做就做咗十八年。
呢排樓價又再度回升，唔知會唔會又推動更加多人投身地產代理業呢？
豪宅市道非常熾熱，連高齡豪宅都有投資者吸納。領域測量師行董事總經理許賡勝話，西半山干德道康苑，有兩個單位由投資者斥二千八百三十八萬購入，持作收租。
許賡勝話，低座十樓A室，三千三呎，以一千一百五十萬售出。業主揸咗幾十年，趁市旺先放售。
另高座十六樓複式，四千呎，銀主以一千六百八十八萬賣出。
康苑樓齡逾四十年，但因同區少三千至六千呎單位，物業又位近半山行人電梯，所以吸引投資者興趣。
早前傾妥價錢，以市價買兩伙，但簽約有啲阻滯，至拖到𠵱家。因豪宅價再升，造價變成平市價少少。
淺水灣道117號豪宅GrosvenorPlace，日前攞咗「第十五屆國際房地產交易會」中「全球最佳住宅物業」獎。
發展商GrosvenorAsia，諗住「打鐵趁熱」，噚日搞視像會議，推介吓個樓盤同攞威。
蘭西去到，先知原來搞唔成，改做越洋電話會議。一眾小記惟有對住部電話問問題。還幸，最後都攞到市場最關心嘅意向價，同開售資料，率先向讀者披露。
蘭西
電郵地址：
