大市繼續反彈，恒指一度重上13000，升逾100點，但力度唔及預期，午後走勢偏軟，原來市場做緊幾單大「刁」，除中石化（386）落實外，重有兩間大國企亦傾緊數。
恒指收12975，升43點，滙控（005）除咗息，期指本來大部份時間已平水，但收市後傳來「披成」消息，期指又再插過，重低收12899，又變番低水76點。中石化手貨係由蜆殼批出，上限價約3.15元，折讓唔算大，由於呢輪大市氣氛唔好，散戶認購已冇早輪咁勇。
國企業績唔單止對辦，更且令人喜出望外。華能國際（902）去年賺54.3億元（人民幣．下同），升39%，且派0.5元高息，紅股10送10，刺激股價大升1.15元，升幅8.1%。噚日下晝宣布嘅中電信（728），去年獲利246.9億元，大升1.5倍，遠比市場預期的平均數約210億元為佳。國企業績咁靚，在大市調整期間，走勢仍會反覆造好。
江西銅業（358）去年業績雖與預期相若，但今年盈利會以倍計增長，現價重係好吸引。
03年度（12月年結），江銅營業額54.2億元，升62.9%，獲利5.1億元，大升198%，每股盈利0.19元，派息0.12元，派息比率高達63%，遠比市場預計的不足50%為高。
去年國際銅價上升逾50%，金價則創出8年新高，期內江銅的陰極銅、金和銀產量分別上升48%、25%同82%，令毛利率大幅改善。今年，金價預期會在380美元至420美元之間上落，而內地同國際期貨市場的對沖活動，預期亦可把銅價穩定在2500至3000美元的高水平。
江銅計劃向母公司收購兩座礦山資源，令銅礦儲備增加至1100萬噸，並會在東南亞收購銅礦及冶煉廠。今年，集團將分別提高黃金和白銀的產量19%和27%，而陰極銅則會增產6萬噸至逾40萬噸。
根據大行估計，江銅04年盈利約12億元，每股盈利0.45元（折0.42港元），預測PE僅10.4倍，與國際同業平均的20倍PE比較，頗為吸引，大行目標價由5.5元至6.0元不等，短線可炒波幅，中線可財息兼收。
郭兆誠