滙控（005）除息1.87元，拖低恒指67點。恒指收市升43點，若然計埋滙豐除息因素，實際係升110點。
國企成績表普遍理想，相關股份有利好反應，唔炒個別國企Call輪，可揀中企指數Call輪埋手。講數據，唔講成交，9363同9364唔錯。9363今年6月夠鐘，輪價43.5仙，溢價0.03%，槓桿率5倍；9364同日夠鐘，輪價42仙，溢價2.3%，槓桿率7倍。兩隻輪都係交投淡靜。想買賣熱鬧，有幾隻遠期輪可以諗，不過睇埋啲溢價超過10%至20%，又買唔落手。
華能（902）成績表靚靚，送股，又派唔錯股息，收15.20元，升8.2%。10大龍虎榜上，8隻係華能Call輪，升幅由25%至62%。大多數Call輪都有幾個巴仙溢價，上車前最好計埋正股派息0.50元人民幣嘅因素，要將表面溢價打大3%左右，所以高追未必着數。計數揀輪，9913比較啱睇，6月到期，輪價2.925元，負溢價2.6%，槓桿率5.2倍，計埋正股股息因素，隻輪實際只有輕微溢價。
大唐（991）派送亦靚，股價升3.2%，相關Call輪都有進帳。9401收1.38元，升20%，7月到期，溢價1.2%，槓桿率4.7倍，估計重有啲水位。最旺嘅9744，亦升22%，有85球易手，收42仙，9月到期，槓桿率15.5倍，買之前諗清楚溢價26.5%，是否值得。
章盛