巴治奧前日發表咗一封公開信，透露佢射入意甲二百球嘅心迹同埋再解釋退休嘅決定，預先向球迷發出告別宣言。事隔一日，意大利國家隊教練查柏東尼就話打算召巴治奧踢一場國際友賽，表揚佢多年嚟對國家隊嘅貢獻。咁有人情味，希望巴治奧肯接受呢份禮物啦。
老查話：「我知道佢就快引退，我打算邀請佢踢一場友賽，可能喺下月尾對西班牙，作為佢完成輝煌事業嘅一份賀禮。」雖則巴治奧曾埋怨老查唔選佢踢世界盃，但往事已矣，巴治奧擁躉一定希望佢肯再披國家隊戰衣，就算只得一場都係美事。
另外，巴治奧認定羅馬前鋒卡斯辛奴最有資格做佢接班人，似乎將佢未能為國家隊完成嘅捧盃夢寄託喺後輩身上。雖然卡斯辛奴欠缺巴治奧嗰份懾人魅力，但希望佢得到前輩「欽點」後，會加倍發奮啦。
因膝傷今季已肯定無緣亮相嘅芝加哥公牛老將柏賓，噚日話自己嘅身體已經唔能夠再打落去，下季幾乎肯定要收山。佢𠵱家只想打多最後一場，作為告別戰。我求大俠都睇咗「二哥」打波十幾年喇，真係希望佢得償所願，可以同波神佐敦一樣喺球場上向廣大球迷道別。
「老虎仔」活士喺下月中打完大師賽後，將會喺北卡羅萊納州參加一個為期四日嘅軍訓。原來佢喺越戰時做過特種部隊嘅老竇Earl，當年曾經喺呢個軍事基地受訓，所以老虎仔就專登揀咗喺呢度受訓。講打仗老虎仔當然拍馬都追唔上老竇，不過講打波佢認第二冇人敢認第一。
前晚燦美爾對米禾爾嘅足總盃半準決賽重賽，場上球員個個都貫徹英國波精神，真係打甩髀都要打；比賽中各有球員曾經受傷倒地，但係隊友都冇踢個波出界，等軍醫入場睇睇，係都要繼續進攻。雖然佢哋好似好冇「義氣」，但場波亦因為冇乜停頓過，全場快上快落，幾好睇㗎！
我求大俠都幾欣賞AC米蘭班波，之但係唔多欣賞佢哋嗰位總理會長貝盧斯科尼。總理先生近日就話AC全靠佢至有今日成就，唔明點解傳媒淨係讚教練同球員，而唔讚佢。無人懷疑佢對球會嘅貢獻，不過慣咗響政壇搶人風頭嘅佢，估唔到呢啲風頭都想搶埋，唔使咁啩？