爆機狂迷：<br>新加內政要動腦諗計搵錢升LV

爆機狂迷：
新加內政要動腦諗計搵錢升LV

喜愛《三國志》系列運用戰略內政元素嘅玩家，對新一集《真．三國無雙3》必定有唔少驚喜，既保留咗以往激烈打鬥場面，最大特色係加入「政略」系統，令玩法更多元化，除咗要喺戰場上取得勝利外，更要以統一全國為目標，就好似玩緊動作版嘅《三國志》一樣。

記者：許福合

新一集嘅《真．三國3》加入嘅「政略」系統，與《三國志》系列不同，簡單直接得多，採用回合制，每次都會由君主及屬下三名武將提出可執行嘅政策，玩家只需有足夠資金就可進行，政略系統一共有7大類，包括開發、人事、外交、內政及軍事等50項指令。要喺《真．三國3》有效發揮政略，就要有效運用金錢，遊戲初期資金有限，需要因應形勢選擇，玩家亦可透過任命軍師，當執行由佢所提出嘅政策，費用會減少15%，能更加速富國強兵，直接提升國力。

■每個回合，每名武將可以執行兩項工作。

■與鄰國同盟係保存國力最佳方法。



不同升級目標
開始遊戲之前，玩家需要選擇「演義」同「幻想」模式，前者根據史實事件，以《三國演義》基礎進行遊戲，例如選用劉備就有趙雲同孔明用，而後者就可自由選擇武將作君主，適合唔鍾意俾史實限制嘅玩家。遊戲更引入類似RPG嘅升級制度，不過同一般儲經驗值方式唔同，每名武將都有不同升級目標，部份可透過戰場獲得武勳或工作指定回合就可以升級，能提升武將能力同帶兵數，另外同以往一樣，道具亦有助提升戰鬥力，但今集道具變成土產，勢力範圍會決定擁有嘅道具種類，而且部份道具裝備一次，就要等5、6個回合先用得番。

■出動巫女兵團助陣，不知攻擊力如何？

■同盟國久唔久會提出交換、出兵等要求，答應與否隨你定。

■使出連續必殺技，當然可以橫掃千軍。

■武將升級其中一個途徑係戰場上獲得武勳。

■三英戰呂布，當用劉備就必然會發生嘅重大事件。

■唔同地域會出產不同道具。

加入據點戰鬥
新作加入據點戰鬥，並會以紅點喺地圖顯示，敵方攻擊會特別強勁，需要玩家逐個擊破據點來擴大領域，成功支配整個領域就能消滅據點內嘅敵兵，以往單刀直入殺敵方式再行唔通。操作方面，基本上無多大改變，而每名武將都有唔同戰鬥技能，包括「突擊」、「鐵壁」等等，其中突擊可提升攻擊力向敵軍進行突擊；而鐵壁就可提升防禦力，還可以埋伏或搜索對方嘅伏兵，非常有用，不過只能靠電腦隨機發動，要碰運氣。另外，玩家如果需要回復體力，可享用蒸籠上嘅肉包，間中打倒敵人後，會出現提升技能嘅道具，但只能短暫起作用，影響比以往小。

■孔明嘅戰鬥力都唔可以睇小。

■新一集可自建新武將，又或繼承《猛將傳》自創角色。

■地圖顯示雙方據點及相連路線，按情況決定攻擊次序，有點似戰略版《三國志》。



售賣點：
DreamStore
查詢電話：25753285
地址：灣仔東方188商場256號舖

■競鬥模式中，可以與朋友互相競爭比拼打倒敵人數量。

■今集有熱氣騰騰嘅肉包、燒雞等，不過出現率較上集低。