港股噚日持續反彈，但始終受制於13000水平，恒指全日收報12975，升43點。
噚日港股大新聞，有中電信（728）計劃發行83.17億新股，集資約237億元，收購母公司10省市網絡。蜆殼石油搶閘，配售18.5億股中石化（386），抽水85億元。經此一役後，中石化策略性投資者沽貨，已經沽得七七八八，而今次配股價折讓只得3至5%，反映包銷商早已搵齊大戶接貨，後市股價應該唔會有太大震盪。不過，市場焦點可能轉移至畢菲特手上13.35%中石油（857）H股的去向。
金勞詹又出手買入北方興業（736），刺激該股急升100%至3.6仙。阿虎發覺金勞詹最近入股的公司，有一個共通點，就係全部都係仙股。之前的信用卡防盜（1051），噚日收8.7仙，駿雷（070）收報4.2仙。唔知係咪因為咁，唔少仙股亦起哄，太平洋實業（767）升22.5%至4.9仙；和記行（720）升20%至5.4仙；華多利（1139）升19.5%至4.9仙；新數碼（276）升15%至4.6仙。據聞近排有炒家專吼仙股炒，不妨留意一下。
中芯（981）公開發售部份，超購271倍，比市場預期的1千倍少好多。據聞國際配售部份僅超購10餘倍，一般機構性投資者的分派比率約8%左右，而今次包銷商派貨亦派得幾散，一些與包銷商關係唔太密切嘅經紀行都分到貨，貨源冇原先所想咁歸邊，睇嚟中芯今日嘅表現，或者冇想像中咁樂觀。
阿虎