靚仔歌手同天后分手，天后可以咁平靜，完全係因為佢好快又有另一段感情開始緊，其實靚仔歌手一直冇放棄過天后，所以佢好努力箍煲，但天后同人講，話靚仔歌手做咗太多錯事，係佢冇法子再原諒，所以呢次佢係好決斷。
天后同靚仔歌手分手後，佢班朋友不知幾高興，因為成班friend都對靚仔歌手冇好感，但天后鍾意，大家就唔方便講咁多。
𠵱家天后嘅新對象係一個藝人，雖然年紀係細過佢，錢又冇佢搵得咁多，但天后鍾意就唔會計較，而且重喺錢銀方面成日幫對方㖭，唉！我馮仁昭都唔明天后點解次次都鍾意男朋友細過佢，唔通佢特別鍾意照顧人？
早排台灣《壹週刊》話蔡依林抽脂瘦面，最近一期又搵整容醫生分析佢係咪整過鼻同嘴，噚日蔡依林嘅經理人公司決定採取法律行動，告雜誌之餘，連三位整容醫生都告埋，蔡依林噚日去電視台錄影節目時回應話：「從國中到現在我的身材一直在改變，拿以前的照片來比較現在真的很不公平。」
電影《無極》噚日喺北京開工，導演陳凱歌、攝影師鮑德熙、劉燁同韓星張東健先後抵達北影片廠，因為拍攝內容、造型同場景要保密，佢哋個個都係坐車直入片廠，係劉燁比較親民，喺片廠門口落車，畀記者影吓相，不過劉燁煙癮似乎相當之大，落車時都揸住支煙。
蕭亞軒上周六喺台北出席完佢嘅新書記者會之後，同助手喺街行咗成二十分鐘，目的係去環亞百貨買一個Hermes手袋，但係最終空手而回。事後佢經理人話蕭亞軒早排喺法國見到一個Hermes手袋幾靚，想買多一個送畀媽咪，但係台灣冇入呢個款。Hermes手袋閒閒哋過萬港紙，蕭亞軒送咁貴嘅手袋畀阿媽，果然夠晒孝順。
葉文輝（啤梨）噚日接受新城電台訪問，佢話三月尾就會出碟，重話好鍾意個唱片封套，佢話：「因為我個樣唔會影得好清楚，本身我唔識擺甫士，又冇迷人嘅眼神，所以今次影得自然，所以好靚。」近排出碟嘅陳冠希嘅唱片都係Sell歌唔Sell樣，唔通啤梨覺得有效所以跟風？
前澤東經理人部門負責人、現任芝栢公司公關嘅Agnes結婚，前晚喺尖沙嘴皇庭酒家設宴，到賀嘅圈中人包括導演王家衞、馬偉豪、張震、楊千嬅同袁詠儀等，場面熱鬧。
張震表示送禮金最實際，至於電影《2046》幾時拍完，佢就話自己只係拍咗一部份。另外古天樂同梁朝偉雖然冇到賀，但都有派人送禮金畀一對新人。
