唔知大家有冇留意到，近日日本女星慷慨咗好多呢。我羅拉嘅意思係，就算唔鍾意騷胸博搶鏡嘅美女，𠵱家出嚟，都好樂意露一露雪白嘅玉背，感覺更加風騷入骨。點解佢哋突然咁「疏爽」，之唔係多得上年發明嘅隱形nubra囉！
我羅拉聽講，nubra已經成為日本女星衣櫃入面嘅必備品，佢哋𠵱家冇「後顧」之憂，後面嘅deepV重愈嚟愈誇。大家或者可以學吓平山綾同大竹忍，前面就平平無奇，箍到上頸，但後面原來有個大窿，出奇不意嚇你一驚。
不過露背嘅潮流一出之後，即出現石田百合子、黑谷友香同深津繪里撞衫撞到七彩事件，佢哋最近同時間都着咗LANVIN嘅新裝，前兩位重跟足全套加埋模仿bra帶嘅吊帶，令個look冇咁單調。
不過咁，我羅拉提議各位初學嘅姊妹，唔好着嗰啲「有前又唔顧得後」嘅款式住，好似初行性感嘅田中麗奈件CLASSrobertocavalli咁，為咗顧就住後面個大窿，搞到個nubra都走咗出嚟，認真醜怪！