惡佬明一行人等，三月十三日晚去聽羅大佑演唱會，羅大佑除咗唱歌之外，重幾番語重心長咁呼籲香港人「守住、守住」，守住啲乜嘢呀，羅大佑就冇畫公仔畫出腸，不過此時此刻，大家都怕心知肚明。惡佬明認為守住守住雖有意思，如果羅大佑講「頂住、頂住」，香港觀眾更能心領神會。
左丁山大笑：「你估喺馬場嗌隻馬頂住咩！」惡佬明諗吓，亦笑出聲：「今日第十場，我大聲嗌『熊豹』頂住、頂住，最後都係頂唔住隻『大躍馬』，結果輸win中Q，算啦。」頂住、頂住，香港馬迷嗌得最大聲。𠵱家好多所謂「愛國派」（林行止所講嘅精忠、愚忠、盲中中，真係一絕）衝擊香港行之有效嘅言論自由，香港人唔頂住點得。
惡佬明好耐冇揸車去銅鑼灣，近日居然去銅鑼灣「探險」，揸架車出咗時代廣場停車場，竟然右轉入波斯富街，交通警察早已站在街口，笑哈哈咁行埋嚟抄牌，告佢不小心駕駛。上庭之日，佢發覺原來有好多人以種種不同藉口為自己辯護，但佢見到，愈講得多嘢，法官愈不耐煩，除咗罰錢，重要被判到駕駛學校上堂三個月，惡佬明寧願罰錢都唔想去上堂，一於唔辯解，低頭認錯，罰咗七百蚊了事，鬆咗一口氣。最過癮係一個警方衝鋒車司機亦被控告衝紅燈，惡佬明大惑不解，特登留心去聽。衝鋒車司機話佢因公載住一個孕婦到醫院，為咗一條新生命，所以盡量快，衝紅燈，但法官話佢身為警察知法犯法，一於照罰，可見香港執法司法幾公正。