鄭希怡（Yumiko）昨日在柴灣拍攝瘦身產品廣告，現場布置成浴室布景，一身性感tubetop及超短牛仔褲打扮的Yumiko要躺在一張S形長椅上，卻因為椅子太跣，她在椅子上跣上跣落，久久未能擺好甫士。
Yumiko今次拍廣告更搏到盡演出浴鏡頭，不過卻先上演了一幕手忙腳亂的防穿崩鬧劇。她表示早前在眾多工作人員面前，拍攝出浴鏡頭，更一拍就拍了三個小時。
Yumiko說：「沖到甩皮咁滯，我有着泳衣打底，不過佢哋話唔要見到泳衣條帶，夾硬扯斷條帶，我重用自己帶嗰條HelloKitty毛巾圍住，不過俾水浸到條毛巾重晒，顧得前又顧唔到後，後面又有個男人匿埋幫我調校水溫，成日問我啲水啱唔啱。」
Yumiko說：「用咗產品都瘦咗四、五磅，況且自己塊面一向包包哋，𠵱家解決咗梗係開心。」
採訪：卓美娟
攝影：陳慧安