呢排班「左頭左腦」亂將港人扣以漢奸同唔愛國等莫須有罪名，大家去美國真係要小心講嘢。中大新亞書院一月中派咗八名學生到美國耶魯大學交流，其中兩名學生就膽粗粗，揀咗舊年香港人7.1反《基本法》23條壯舉，作為口頭報告題目，吸引逾五十名耶魯大學生聆聽。
讀緊社會學系二年級嘅陸蔚芯同學話，啲耶魯生好關心香港人點樣爭民主，對佢哋問咗好多問題，如五十年後香港政治會點？商人喺反23條事件中嘅立場等，佢哋都一一如實回答，睇嚟分分鐘熱鬧過李柱銘出席美國國會嘅聽政會。
近日八名耶魯生回訪中大，其中日本籍學生NaokoKozuki話，嚟咗香港幾日，發現香港好獨特，同內地好唔同。
呢班耶魯生嚟到香港，中大當然有盡地主之誼，帶佢哋遊覽香港名勝同埋食香港美食，陸蔚芯話佢哋當中有人見到連頭嘅白切雞唔敢食，當然唔係因為怕禽流感，而係覺得隻雞好似重有生命而食唔落；又有人覺得雞腳同蒸鱔核突，耍手擰頭，話唔食。
（圖）八名耶魯大學生近日到中大交流，一月中喺耶魯講23條嘅陸蔚芯（前右二）當然要盡地主之誼，好好招呼佢哋。 區民傑攝
傳真︰2623-9278
電郵︰