有個大老細阿巴莫域治照住，車路士使錢豪爽冇留手之餘，使錢花款亦多過人；最近佢哋就決定，向即將於今季後約滿離隊嘅老將迪西里，發放一筆多達一百五十萬鎊（約二千一百一十六萬港元）嘅「長期服務金」。
你可以話車路士對待忠心耿耿嘅球員咁好，真係有人情味；但亦有傳聞話呢個都係阿巴莫域治「洗錢」方法之一。我求大俠就戥早迪西里一季離開嘅迪高爾及蘇拿等老將唔抵囉。
有咗迪西里呢個例子，唔知道成日喊走人嘅哈索賓基，會唔會又變得甘願留低，博攞番個「老人金牌」呢？
一般職業足球員，三十二歲之後表現漸走下坡嘅例子俯拾皆是；偏偏西甲聯華倫西亞左後衞卡邦尼，今年三十有八，仍然能長期維持高水準演出，更搏得華倫同佢再續兩年新約至○六年。事實上，職業球員打咗咁多年都重有貨賣係好難得，抵你卡邦尼搵多兩年退休金嘅！
查爾頓後衞費殊認真唔好彩，日前遇到家居意外，唔小心跌落張玻璃枱度，雖然冇性命危險，但就縫咗三十九針，起碼要休息三個禮拜。其實，好似華倫西亞門將簡尼沙利斯、曼城門將占士都試過因家居意外而長唞，我求大俠亦提醒各位球員及球迷，喺屋企都要提高警覺。
因得罪法國教練辛天尼而冇得入選國家隊嘅曼城前鋒安歷卡，終向現實低頭公開道歉。安歷卡份人一向硬頸，但佢見停賽五場嘅施斯幾乎肯定冇得踢今屆歐洲國家盃決賽周，即時同辛天尼認錯，希望對方可畀個機會佢。安歷卡係個唔錯嘅前鋒，如果入返隊對法國隊有利冇害。
幾已被人遺忘嘅智利前鋒沙拉斯最近響母會河床鹹魚翻生，今季連續四場聯賽入波，唔單止河床有意畀張長期飯票佢，連智利國家隊都重召佢。沙拉斯成三年無踢國家隊，佢同已退役嘅森莫蘭奴一齊喺國際賽累積三十四球，希望發咗霉咁耐嘅佢，可以刷新智利國家隊紀錄啦。