【本報訊】不懂游泳卻想享受水中運動的樂趣，水中健體課程可能是你的選擇。由於水的浮力能夠減低運動者的負重及關節壓力，即使是不宜進行劇烈運動的長者及孕婦，都可以藉此舒展筋骨，減輕腰痠背痛、關節痛等問題。對於「由朝坐到晚」、在辦公室工作的人士也有幫助。 記者：張嘉雯
「有啲人有肩周炎，做得幾次之後，都有唔少人會同我講番冇咁痛，唔使再食止痛藥。」水中健體教練黎美怡表示，此運動溫和安全，效果理想，其中八成有脊骨問題的學員，病情會改善，「水有浮力，減低一個人喺陸地上嘅重量，踢吓腳、郁吓手都容易啲，對關節痛、腰勞損同埋膝關節嘅問題都好。」
黎美怡解釋，要達到健體效果，學員需要每周進行三次、每次半個小時的練習，有問題的部位要加強訓練，同時配合按摩及物理治療，「要長時間去做，同埋配合睇醫生，年幾兩年先有效果。」她又鼓勵經常坐在辦公室的人士參與。
負責該統籌課程、本身是教練的香港中華基督教青年會助理程序幹事阮大偉表示，課程特別適合孕婦及長者，因為前者身體較重，後者多有骨質疏鬆，雙腿通常有各種關節問題，「如果做一般運動，有呢啲情況就會做得唔耐，會冇效果，水中健體其實類似太極同晨運，係全身運動，但對膝關節嘅壓力會細好多。」
「上咗年紀嘅人接觸運動嘅機會亦會比較少，冇理由話叫佢哋去踩單車、打波咁……重有好多主婦，都係腰痠背痛，做家務煮飯、掃地，好少伸展。」阮大偉稱，參加者以女性為主，「男士比較少，可能因為怕醜，要同成班女士一齊上課，但係其實對佢哋（男士）都有幫助。」
黎美怡則認為，一大班人上課更有效果，男士可嘗試克服心理障礙，「一個人跳舞就冇氣氛，自己做又唔知做得好唔好，有教練睇住，糾正動作，就有大啲推動力。」
除了改善關節問題外，水中健體又可帶來減肥效果，所不同的是水中減肥的動作幅度較大，節奏較緊湊，有較多跳躍動作，「同樣係一個星期做三次，但時間要長啲，起碼半個鐘，運動量要夠大，加埋飲食習慣，大概三個月會見到成效。」
阮大偉強調，水中健體運動非常安全，絕大部份人都可以應付，「但係好似有個七十幾歲嘅婆婆，要用枴杖行路，企都企唔穩，咁就唔可以參加。」
