恐怖分子周圍放炸彈，搞到美國無日安寧，美股周一大跌，港股噚日難免受壓，但唔知點解恒指跌跌吓又升返轉頭，收報12932，升13點，成交進一步縮至124億元。
中芯（981）明日正式掛牌，點知發生高層發表失實言論羞家事，事件連累到佢嘅主要股東上實（363）大跌4%，收報17.55元。黑客話，芬佬主要睇招股書做決定，好少會因為高層一時講錯嘢而亂咁沽貨，況且中芯本身係具有成本優勢嘅主要芯片製造商。
至於上實噚日大跌，可能同佢阿媽完成發行換股債，缺乏人為性托價的誘因有關。佢阿媽嘅換股債發行額介乎23.30-27.19億元之間，但現在只發行24.30億元，反應唔算太理想，據聞是由於投資者嫌行使價26.381元過高，加上債券是冇息收。
至於中芯，據聞暗盤價較招股價有10%水位，約在2.90-3元之間。近日大市調整，中芯能力保不失已算了得，如果重有10%執，應該沽貨。
近日，國企股除咗業績表現理想外，在派送方面亦對股東相當慷慨，中海油（883）派特別股息0.18港元，華能（902）10送10紅股，每股再派0.50元人民幣現金股息。今日將公布業績嘅中電信（728），可能亦會出招吸引投資者，否則日後中電信配股時，搵邊個接貨？
市場傳出東方海外（316）將加運費，以致股價勁升4.8%，但同屬航運股的金輝（137）則下跌5.6%。唔通人哋有得加，金輝冇得加？
阿虎