立法會議員赴台觀摩考察團已經完成四日行程，周一晚返咗香港，八方問李華明好番未？佢話真係嘔得好慘而且尷尬，因為人哋搵咗個教授同佢哋講中港台關係，點知佢成日想去廁所嘔，都係為食之過啦。
講番個團，肥仔明話本來有十五個人報咗名，唔知係咪俾人鬧兩鬧，最後得番三條友，佢、阿石同埋親中兼大膽嘅飛天朱。麥國風同何秀蘭話要聽楊永強作供，陳國強同蔡素玉，見到劉慧卿遍體鱗傷咁嘅樣，都有所顧忌啩。
肥仔明當然要去取經，皆因九東一向戰況激烈，媽田李重話要過海取代華叔個位。最後李柱銘花落誰家冇人知，不過，民主黨中人就話好難話過區就過，好多地區工作做落唔搬得走，至於叫民主派喺港島區分五條隊出人，分票亦唔容易。人哋鍾意媽田，你雖然叫佢按身份證最後一個號碼投何秀蘭，個選民未必睬你，咁就蝦碌啦。
（圖）李華明上周五喺台北民進黨造勢大會上影番張相留念。 李華明提供圖片
傳真︰2623-9278
電郵︰