遭狗仔隊十面埋伏　報警
馮仁昭四圍超：許冠傑唔想復出

許冠傑原本諗住復出開演唱會同拍戲，但呢個消息傳出之後，佢即刻受到狗仔隊日夜追蹤，噚日重搞到阿Sam要報警求助㖭。自從前幾日傳媒大事報道佢復出開演唱會之後，呢幾日即刻多咗好多狗仔隊喺佢屋企附近，等阿Sam同佢嘅屋企人出入。噚日佢揸車出嚟嗰陣，啲記者起勢影相，搞到阿Sam好𤷪𤺧，佢報警之後，警員好快到場，不過搞完一輪，警方都話愛莫能助。

「想帶歡樂畀大家」
為咗復出，搞到佢自己同家人受騷擾，阿Sam好鬼嬲，佢噚日話最近俾傳媒咁騷擾法，佢有可能打消復出嘅念頭，免得俾狗仔隊再死跟，阿Sam話：「復出係想帶啲歡樂畀大家，但𠵱家我同家人都受到滋擾，警方又話幫唔到我，𠵱家我個心真係好唔舒服。」

S.H.E加新成員拍MV？
台灣女子組合S.H.E嘅三個成員，原本只有Selina好驚狗，但係佢日前竟克服咗呢個恐懼，重養咗隻狗，日前S.H.E拍MV嘅時候，Selina重特登帶埋呢隻寶貝狗Pinky出嚟，就當日現場所見，Selina母愛氾濫，而拍檔Hebe同Ella亦都對Pinky愛不釋手，三位成員𠵱家可以一齊傾吓狗經，應該更加一條心喇！

韓Fans縛絲帶悼哥哥
喺今年嘅四月一號，係張國榮（哥哥）逝世一周年，一班對佢好忠心嘅韓國fans，一早就準備好悼念活動，佢哋話喺今個月二十八號，會喺漢城嘅三星洞奉恩寺搞法事，又會做張國榮嘅電影回顧。屆時，張國榮嘅fans重會好似上年一樣，縳住代表「永遠嘅愛」嘅黃色絲帶，以表對哥哥嘅一點心意。馮仁昭都覺得哥哥一路存在喺我哋心中。

好姨望楷哥今早報平安
羅浩楷日前出現心痛情況，𠵱家重喺醫院深切治療部，無綫演員薛家燕（好姨）噚日喺將軍澳電視廣播城話：「我同羅太通電話，佢話聽朝（今早）醫生檢查完就會決定做乜嘢手術，或者使唔使做，不過因為醫院只准兩名親友探訪，所以買唔到嘢畀佢食。」

侯孝賢拍大選紀錄片
導演侯孝賢噚日喺台灣公布佢入行首部紀錄片《那一夜，侯孝賢拍族盟》，希望喺周六總統大選前表達各黨派唔同嘅聲音。侯孝賢用國語話：「過去我曾參加反核等團體的會議，但總是沒有得到共鳴，我不希望事情做到一半就結束，就像電影拍到一半一樣。」睇嚟侯孝賢好有決心，要將佢呢部紀錄片公諸於世。

林迪安否認放料
最近內地有報道話謝霆鋒同陳凱歌個老婆陳紅搞姊弟戀，傳聞話個消息係林迪安放出嚟，噚日林迪安為咗呢件事好嬲，佢話：「導演今日睇完呢啲報道走嚟問我，點解有記者會話呢啲消息係由你發放出嚟，我根本冇同記者講過呢啲嘢，所以我一定要搵出幕後黑手。」不過馮仁昭覺得呢啲係笑話一則。