身懷六甲嘅德國名模HeidiKlum，雖然最近宣布同BB嘅老竇、即係雷諾一級方程式賽車隊嘅老闆比亞杜爾（FlavioBriatore）分手。不過Heidi啱啱同百靈牌女士剃毛機賣廣告，七百萬港紙袋袋平安，就算冇男人喺身邊，仍然唔使為奶粉錢惆悵。
將會喺今年夏天首度做媽咪嘅Heidi，早前喺宣布大肚之後，即刻得到百靈牌垂青，簽約做女士剃毛機嘅代言人，好彩當時Heidi重未見肚，所以新一輯廣告，Heidi仍然可以以最fit狀態示人，Heidi話佢身上最值得自己驕傲嘅地方就係對腳，所以今次接咗呢個賣剃毛機嘅廣告，只要騷吓對靚腳就搞掂，真係容易賺。
喺呢輯廣告裏面，Heidi分別着住熱褲同貼身裙騷美腿，如無意外，呢輯廣告應該係Heidi放產假前最後一輯廣告。另外，Heidi最近俾人傳佢同美國黑人男歌手Seal拍拖，跟住有人話Heidi個個男人都其貌不揚，Heidi對於呢啲閒言閒語當然一笑置之。