隔晚歐美股唔掂，好友諗住今回要連跌6日，原來唔係，恒指尾段兜番上。
是日龍虎榜上，有幾件係中電信Call輪，例如9466與9910同升14%，9225亦12%，由正股（728）升10仙帶動。9466係熱門貨，有15球易手，但睇數據唔抵買，輪價23仙，有4個月壽命，溢價上到17%，槓桿率12.2倍。若然正股只係蝸牛上樹咁，溢價係咁縮，可以輸得好淒涼。9910實際得多，6月到期，輪價54仙，溢價0.7%，槓桿率5.2倍，不過成交疏落係缺點。9225亦喺6月夠鐘，輪價33.5仙，溢價6.6%，槓桿率8.3倍，夠成交轉身，勉強可以。
龍虎榜上有長和系Call輪，例如長實9240同9160，和黃9193同9066，共同點係下月至5月夠鐘，溢價好高（9066較低），槓桿率勁大。炒呢啲輪，好似喺葡京賭大細，上落快，贏輸講緊一日幾十個巴仙，以9066為例，高位9.3仙，低位6.6仙，波幅高達41%。幾個鐘頭內，你荷包啲錢流入人哋荷包，或者人哋荷包啲錢流入你嘅荷包。
互聯控股公司輪1144，升13%，正股（273）冇郁，實際按盤價跌兩格。1144明年5月到期，竟然負溢價16.5%，槓桿率1.6倍，咪因負溢價貪埋啲小便宜。
章盛