【本報訊】歌影青春偶像陳冠希昨日舉行記者會，交代被兩少年在中環毆打的事件經過，他引用聖經所言要寬恕別人，亦因為其中一名少年母親求情，所以不打算追究。陳冠希在記者會多次強調，他遇襲後在中環追逐兩少年十分鐘，其間有很多途人見到，但沒有一個人出手相助，他呼籲若在街上見到別人被打、或者被搶劫，大家可以幫幫手。 記者：王連連、何永寧
陳冠希（Edison）前日在中環打算去髮型屋剪髮時，遇到兩名身穿校服的少年，其間有人在陳冠希面前大跳HipHop舞示威，並揮拳狂毆陳冠希至倒地，陳不甘被打，在街頭追逐兩少年，成功擒獲兩人，並將兩人交給警方處理。陳冠希表示，他不清楚被打原因。
昨日下午三時半，陳冠希在兩名助手左右攙扶下，一拐一拐地到達中環麗嘉酒店，由其經理人管小姐陪同下召開記者會，陳冠希表面沒有明顯傷痕，右眼蓋略為紅腫，而左耳後亦有瘀痕。
陳冠希說：「噚日（即前日）下晝四點，我打算去髮型屋整頭髮，有兩個男仔用英文問我係咪Edison，我冇理佢哋行上電梯，佢哋就打我，我擋，我俾人打到落地，起身追時見到有記者，但我冇理，只顧追嗰兩個男仔。兩個男仔上的士，我攔住架的士唔俾佢哋走，佢哋由另一道門落車，之後我call經理人公司同事幫手，我喺街追咗十幾分鐘，最後喺番佢哋打我嘅地方追到佢哋，交咗俾差人處理。」
陳冠希續說：「差人問我落唔落案，我話睇咗醫生先，醫生話我冇大傷，只係打傷咗頸，塊面有啲腫，只係皮外傷，我追的士時又仆親，扭傷隻腳，應該一個禮拜到冇事。差人同我講，有記者可以做證人，其中一個男仔嘅媽咪打畀我求情，話兩個細路好對唔住，我又冇乜受傷，件事過咗算啦，雖然我覺得自己非常之唔抵，無端端俾人打，但𡃁仔十五、十七歲，落案同樣對佢哋好唔公平，將來嘅路更加困難，或者佢哋只係一時衝動，或者認叻，我唔知佢哋乜嘢心態，希望佢哋諗清楚做嘢唔可以咁衝動，後果可以好嚴重，我原諒兩個細路，但佢哋要知道自己係錯。」
講到追逐期間無人幫忙時，陳冠希多次唉聲歎氣，他說：「追逐咗十幾分鐘，但冇人幫手，我猛叫都冇人理我，好多巿民見到我追住兩個細路，點解唔幫？如果你哋第二時見到條街有乜事，有人俾人恰或者俾人打，又或者搶嘢，希望大家幫幫手，冇理由咁多人睇冇人理。」
陳冠希表示不清楚兩個少年會否親自向他道歉，他說：「佢哋冇當面講，只係其中一個媽咪希望可以和解，我當然想佢哋道歉。我一直有睇Bible（聖經），Bible叫我哋原諒別人，我已經原諒佢哋。」
